قر دەنساۋلىق ساقتاۋ مينيسترلٸگٸنٸڭ رەسمي ٶكٸلٸ باعدات قوجاحمەتوۆ سوڭعى 3 اپتادا ەلٸمٸزدە كوروناۆيرۋس ٸندەتٸن جۇقتىرۋ دەرەكتەرٸن ايتتى, دەپ حابارلايدى "ۇلت اقپارات".
ونىڭ سٶزٸنە قاراعاندا, پتر سىناق تەرٸس نەتيجە كٶرسەتكەن, ياعني كوروناۆيرۋس ينفەكتسيياسىنىڭ بەلگٸلەرٸ بار پنەۆمونييا بويىنشا 1-24 تامىز ارالىعىندا 22 744 ناۋقاس تٸركەلدٸ. 4 519 ناۋقاس جازىلىپ شىقتى, 258 ادام قايتىس بولدى.
«سوڭعى 3 اپتاداعى جاعدايدى سالىستىرمالى تٷردە جەتكٸزسەم, تامىزدىڭ 3-9-ى ارالىعىندا 7 108 ادام كوروناۆيرۋستى جۇقتىرعان. 222 ادام قايتىس بولدى. پتر تەست تەرٸس نەتيجە كٶرسەتكەن 7 940 جاعداي تٸركەلگەن. 122 ادام كٶز جۇمدى. ال تامىزدىڭ 10-16-سى ارالىعىندا جاعداي بٸرشاما ٶزگەردٸ. ياعني, COVID-19 ۆيرۋسىن 3 995 ادام جۇقتىردى. 151 ادام قايتىس بولدى. پتر تەست تەرٸس نەتيجە كٶرسەتكەن 5 344 جاعداي تٸركەلدٸ, ونىڭ ٸشٸندە 64 ادام قايتىس بولدى. سوڭعى اپتادا, تامىزدىڭ 17-23-ٸ ارالىعىندا COVID-19 ٸندەتٸن 1 685 ادام جۇقتىردى, 108 ادام قايتىس بولدى. 4 138 ادامنىڭ پتر تەستٸنەن تەرٸس نەتيجە انىقتالىپ, ونىڭ اراسىندا تاعى 40 ادام كٶز جۇمدى», - دەدٸ ول ورتالىق كوممۋنيكاتسييالار قىزمەتٸندەگٸ بريفينگ بارىسىندا.
