سۋرەت: gov.kz
تاياۋدا عانا مەدەنيەت جەنە اقپارات مينيسترٸ قىزمەتٸنە تاعايىندالعان ايدا بالاەۆا Sputnik قازاقستان سايتىنا سۇحبات بەرٸپ, ەلدٸ الاڭداتىپ جٷرگەن بٸرقاتار سۇراققا جاۋاپ بەردٸ.
بۇل رەتتە مينيستر بيىل بٸرنەشە رەت ٶتپەي قالعان رەسەيلٸك ەنشٸلەردٸڭ كونتسەرتتەرٸنە قاتىستى پٸكٸر بٸلدٸردٸ. ايتۋىنشا, مينيسترلٸك كونتسەرتتەردٸ ۇيىمداستىرۋشىلارعا ٸس-شارانىڭ مازمۇنىنا قاتىستى قاتاڭ تالاپ قوياتىن بولادى.
"ەگەر مۇنداي كونتسەرتتەر قوعامدى ەكٸگە بٶلٸپ, ەرتٷرلٸ ارانداتۋشىلىق كٶرٸنٸستەر تاباتىن بولسا, وندا ولارعا قاتاڭ تىيىم سالىنادى. مەنٸڭ ويىمشا, ەرتٸستەر ٶز ٸس-ەرەكەتٸمەن ادامدارعا تەك مەدەني ٷلگٸ, رۋحاني ٸزگٸلٸك تاراتۋى كەرەك. ال ەندٸ بٸزدٸڭ قوعامىمىز ٷشٸن بۇنداي كونتسەرتتەر ساياساتتى ەمەس, ٶنەردٸڭ ٶزٸن ناسيحاتتاۋى كەرەك. بۇل سول ٶنەر يەلەرٸنٸڭ ازاماتتىعى مەن ۇلتىنا ەشقانداي قاتىسى جوق مەسەلە دەپ ويلايمىن", - دەدٸ بالاەۆا.
وسى ورايدا مينيستر بارشا قازاقستاندىقتى ەلەۋمەتتٸك جەلٸدەگٸ ارانداتۋشىلىققا جول بەرمەۋگە شاقىردى.
سونداي-اق مينيستر بيىل مامىر ايىندا قابىلدانعان بۇيرىققا قاتىستى تٷسٸنٸكتەمە بەردٸ. وسى قۇجات بويىنشا كٶشە مەن اۋىل اتاۋلارىن ٶزگەرتۋگە قاتىستى شەشٸمدٸ جەرگٸلٸكتٸ تۇرعىندار قابىلدايدى.
"ونوماستيكا مەسەلەسٸ بٸزدٸڭ ەلٸمٸز ٷشٸن ەر ۋاقىتتا ٶزەكتٸ مەسەلە بولعان. قوعامىمىزدا كٶشەلەر مەن ەلدٸ مەكەندەردٸڭ اتىن اۋىستىرۋ بويىنشا باستاما دا, ۇسىنىس تا كٶپ. سونىڭ بەرٸ ەلەۋمەتتٸك جەلٸدە بولسىن, قوعامدا بولسىن, بەلسەندٸ تالقىلانىپ جاتادى. ول ۇسىنىستارعا قارسى ازاماتتار دا از ەمەس. الايدا وسى مەسەلەنٸ سول ەلدٸ مەكەندەردٸڭ تۇرعىندارى ەمەس, كٶبٸنەسە, جەكە بەلسەندٸلەر كٶتەرٸپ جٷرەدٸ. داۋلاساتىن دا, جاۋلاساتىن دا سولار. سوندىقتان بٸزدٸڭ مينيسترلٸك بۇل مەسەلە بويىنشا ارنايى بۇيرىق شىعاردى. وعان سەيكەس, كٶشە مەن مەكەندەردٸڭ اتاۋلارىن ٶزگەرتۋ, يا ٶزگەرتپەۋ مەسەلەسٸن ەڭ بٸرٸنشٸ سول جەرگٸلٸكتٸ جەرلەردە تۇراتىن ازاماتتاردىڭ ٶزدەرٸ شەشۋٸ كەرەك. ول ەڭ بٸرٸنشٸ سولاردىڭ قۇقىعى", - دەپ اتاپ كٶرسەتتٸ بالاەۆا.
