Sýret: gov.kz
Taiaýda ǵana Mádeniet jáne aqparat ministri qyzmetine taǵaiyndalǵan Aida Balaeva Sputnik Qazaqstan saityna suhbat berip, eldi alańdatyp júrgen birqatar suraqqa jaýap berdi.
Bul rette ministr biyl birneshe ret ótpei qalǵan reseilik ánshilerdiń kontsertterine qatysty pikir bildirdi. Aitýynsha, ministrlik kontsertterdi uiymdastyrýshylarǵa is-sharanyń mazmunyna qatysty qatań talap qoiatyn bolady.
"Eger mundai kontsertter qoǵamdy ekige bólip, ártúrli arandatýshylyq kórinister tabatyn bolsa, onda olarǵa qatań tyiym salynady. Meniń oiymsha, ártister óz is-áreketimen adamdarǵa tek mádeni úlgi, rýhani izgilik taratýy kerek. Al endi bizdiń qoǵamymyz úshin bundai kontsertter saiasatty emes, ónerdiń ózin nasihattaýy kerek. Bul sol óner ieleriniń azamattyǵy men ultyna eshqandai qatysy joq másele dep oilaimyn", - dedi Balaeva.
Osy oraida ministr barsha qazaqstandyqty áleýmettik jelidegi arandatýshylyqqa jol bermeýge shaqyrdy.
Sondai-aq ministr biyl mamyr aiynda qabyldanǵan buiryqqa qatysty túsinikteme berdi. Osy qujat boiynsha kóshe men aýyl ataýlaryn ózgertýge qatysty sheshimdi jergilikti turǵyndar qabyldaidy.
"Onomastika máselesi bizdiń elimiz úshin ár ýaqytta ózekti másele bolǵan. Qoǵamymyzda kósheler men eldi mekenderdiń atyn aýystyrý boiynsha bastama da, usynys ta kóp. Sonyń bári áleýmettik jelide bolsyn, qoǵamda bolsyn, belsendi talqylanyp jatady. Ol usynystarǵa qarsy azamattar da az emes. Alaida osy máseleni sol eldi mekenderdiń turǵyndary emes, kóbinese, jeke belsendiler kóterip júredi. Daýlasatyn da, jaýlasatyn da solar. Sondyqtan bizdiń ministrlik bul másele boiynsha arnaiy buiryq shyǵardy. Oǵan sáikes, kóshe men mekenderdiń ataýlaryn ózgertý, ia ózgertpeý máselesin eń birinshi sol jergilikti jerlerde turatyn azamattardyń ózderi sheshýi kerek. Ol eń birinshi solardyń quqyǵy", - dep atap kórsetti Balaeva.
