مەملەكەت باسشىسىنىڭ تاپسىرماسى بويىنشا ەۋە اپاتىنىڭ سەبەپتەرٸن انىقتاۋ جۇمىستارى باستالدى, - دەپ حابارلايدى «ۇلت اقپارات».
قر پرەزيدەنتٸ قاسىم-جومارت توقاەۆ الماتى ماڭىندا بولعان ۇشاق اپاتىنىڭ سەبەپتەرٸن انىقتاۋدى تاپسىردى.
«الماتى ەۋەجايىندا اپاتقا ۇشىراعان ۇشاقتا قازا بولعان ەسكەري قىزمەتكەرلەردٸڭ تۋىستارى مەن جاقىندارىنا كٶڭٸل ايتامىن. جاراقات العانداردىڭ تەزٸرەك ساۋىعىپ كەتۋٸن تٸلەيمٸن. مەنٸڭ تاپسىرمام بويىنشا ەۋە اپاتىنىڭ سەبەپتەرٸن انىقتاۋ جۇمىستارى باستالدى. بۇنداي وقىس وقيعالار قايتالانباۋى كەرەك», - دەپ جازدى پرەزيدەنت Twitter پاراقشاسىندا.
ەسكە سالا كەتەيٸك, نۇر-سۇلتان-الماتى باعىتىندا ۇشقان ان-26 ەسكەري ۇشاعى اپاتقا ۇشىراپ, تٶرت ادام قايتىس بولدى, زارداپ شەككەن 2 ادام الماتى قالاسىنداعى №4 قالالىق كلينيكالىق اۋرۋحاناعا جەتكٸزٸلدٸ.
ۇشاق راداردان جوعالىپ, الماتى ەۋەجايىنا اپاتتى جاعدايدا قونعانى تۋرالى اقپارات 13 ناۋرىزدا ساعات 17:25-تە تٷستٸ. اپات بولعان جەردە ٶرت شىقتى. قازٸرگٸ ۋاقىتتا ٶرت سٶندٸرٸلدٸ. وقيعا ورنىنا 10 رەانيماتسييالىق جەدەل جەردەم بريگاداسى كەلدٸ.
