تابيعي رەسۋرستاردى ٶندٸرۋ مەن ٶڭدەۋ سالاسىنداعى Eurasian Resources Group (ERG) كومپانيياسى مەن ۆتب بانك قارجىلاندىرۋ تالاپتارىن ٶزگەرتۋ تۋرالى قوسىمشا كەلٸسٸمگە قول قويدى, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
ەۋرازييالىق توپ باسپاسٶز قىزمەتٸنٸڭ حابارلاۋىنشا, قوسىمشا كەلٸسٸم ERG توبىنىڭ ۆتب الدىنداعى 3 ملرد اقش دوللارى كٶلەمٸندەگٸ نەگٸزگٸ بەرەشەگٸن قايتارۋ مەرزٸمٸن 2022 جىلعا دەيٸن شەگەرۋ, بەرەشەكتٸ ٶتەۋ كەستەسٸن ٶزگەرتۋ مەن كوۆەنانتتىق پاكەتتٸ وڭتايلاندىرۋدى قامتيدى.
جاڭا پارامەترلەر (كەلٸسٸمدە قامتىلعان بٸرقاتار شارتتار ورىندالعان جاعدايدا) 2017 جىلى كٷشٸنە ەنٸپ, Eurasian Resources Group ليكۆيدتٸلٸگٸن ارتتىرۋى تيٸس.
«توپ ترانسفورماتسييالانا باستاعان 2014 جىلدان بەرٸ بٸز تولايىم تابىستارعا قول جەتكٸزدٸك. اتاپ ايتقاندا, بيزنەستٸڭ تيٸمدٸلٸگٸن ارتتىرىپ, شىعىنداردى وڭتايلاندىردىق, مەيلٸنشە نارىققا يكەمدٸ بولىپ, بەسەكەگە قابٸلەتتٸلٸگٸمٸزدٸ ارتتىردىق. 2016 جىلى توپ EBITDA تابىستىلىعىن ارتتىرا تٷسكەنٸ قۋانتادى. بٸز سەرٸكتەستەرٸمٸزگە, بٸرٸنشٸ كەزەكتە ۆتب بانكٸندەگٸ ەرٸپتەستەرٸمٸزگە ۇزاقمەرزٸمدٸ سەرٸكتەستٸك پەن بيزنەس جٷرگٸزۋدەگٸ ٸسكەرلٸگٸ ٷشٸن العىس ايتامىز», - دەدٸ Eurasian Resources Group ديرەكتورلار كەڭەسٸنٸڭ تٶراعاسى الەكساندر ماشكەۆيچ.
ونىڭ سٶزٸنشە, قازٸرگٸ تاڭدا ERG نارىقتاعى كٶشباسشىلاردىڭ بٸرٸ رەتٸندە قىزمەتٸنٸڭ تيٸمدٸلٸگٸن ارتتىرىپ, اليۋمينيي, تەمٸر كەنٸ, فەرروقورىتپالار, مىس پەن كوبالت, ەلەكتر قۋاتىن ٶندٸرۋ سالالارىنداعى پەرسپەكتيۆالى ينۆەستيتسييالىق جوبالاردى دامىتىپ كەلەدٸ.
«كومپانييا قىزمەت اتقاراتىن نەگٸزگٸ ٶڭٸرلەر - قازاقستان, افريكا مەن برازيلييادا وسىنداي بەسەكەگە قابٸلەتتٸ پورتفەلدەر قالىپتاستىرىلدى»,- دەپ تٷيٸندەدٸ سٶزٸن ا. ماشكەۆيچ.
