ۇلتتىق قوعامدىق سەنٸم كەڭەسٸنٸڭ مٷشەسٸ, ەۋروپالىق قۇقىق جەنە ادام قۇقىقتارى ينستيتۋتىنىڭ ديرەكتورى مارات بەشٸموۆ پارلامەنت مەجٸلٸسٸنٸڭ قۇرامىنان نە كٷتەتٸنٸن ايتتى, دەپ حابارلايدى قازاقپارات.
«ەندٸ باسقا پارلامەنت قۇرامى بولادى. ٶيتكەنٸ پرەزيدەنتتٸڭ پارلامەنت قۇرامىنىڭ 30 پايىزى جاستار مەن ەيەلدەردەن تۇرۋى كەرەكتٸگٸ جٶنٸندەگٸ باستاماسىنىڭ ٶزٸ قازٸرگٸ پارلامەنتتٸڭ قۇرامىن ەدەۋٸر ٶزگەرتكەلٸ تۇر. جاستار كەلە جاتىر. ويلارى, پايىمدارى, تالاپتارى باسقا. ٶزٸم دە پارلامەنتتە جۇمىس ٸستەگەن اداممىن. ەڭ العاش 2001 جىلى پارلامەنتتٸڭ ەسٸگٸن اشقانىمدا تاڭ قالعانىم بار. سەناتتىڭ ەسكٸ عيماراتتارىندا كٸلەڭ 60-70 جاستاعى اقساقالدار وتىراتىن. سول كەزدە پارلامەنت قابىرعاسىنا قاشان جاستار كەلەر ەكەن دەپ ويلايتىن ەدٸم. مٸنە, قازٸرگٸ جاعدايدى مەن ٶتە پوزيتيۆتٸ فاكتور دەپ سانايمىن», - دەدٸ مارات بەشٸموۆ ەلوردادا ٶتكەن «SAILAU-2021: پارلامەنت سايلاۋىنىڭ الدىن الا قورىتىندىلارى» اتتى ساراپتامالىق تالقىلاۋدا.
ساراپشىنىڭ ايتۋىنشا, پارتييالار پارلامەنتكە ۇسىنىپ وتىرعان قازٸرگٸ ازاماتتاردىڭ كٶبٸ ازاماتتىق ۇستانىمىمەن ەلگە تانىلعان ادامدار. سول سەبەپتٸ ول پارلامەنت پەن حالىقتىڭ اراسىندا كەرٸ بايلانىس كٷشەيەر دەگەنگە سەنٸم بٸلدٸردٸ.
مارات بەشٸموۆ كەيٸنگٸ جىلدارى اتقارۋشى بيلٸكتٸڭ اشىقتىعىنا كٶبٸرەك كٶز جەتكٸزٸپ كەلە جاتقانىن ايتادى.
«ەندٸگٸ كەزەكتە وسى پارلامەنتتٸڭ تٷر-تۇلعاسى تولىعىمەن ٶزگەرەر دەگەن ويدامىز. ازاماتتىق قوعاممەن, ٷكٸمەتتٸك ەمەس ۇيىمدارمەن, باق-پەن ىنتىماقتاستىقتى نىعايتاتىن پارلامەنت بولار دەگەن ٷمٸتتەمٸز», - دەدٸ مارات بەشٸموۆ.
