Ulttyq qoǵamdyq senim keńesiniń múshesi, Eýropalyq quqyq jáne adam quqyqtary institýtynyń direktory Marat Báshimov Parlament Májilisiniń quramynan ne kútetinin aitty, dep habarlaidy QazAqparat.
«Endi basqa Parlament quramy bolady. Óitkeni Prezidenttiń Parlament quramynyń 30 paiyzy jastar men áielderden turýy kerektigi jónindegi bastamasynyń ózi qazirgi Parlamenttiń quramyn edáýir ózgertkeli tur. Jastar kele jatyr. Oilary, paiymdary, talaptary basqa. Ózim de Parlamentte jumys istegen adammyn. Eń alǵash 2001 jyly Parlamenttiń esigin ashqanymda tań qalǵanym bar. Senattyń eski ǵimarattarynda kileń 60-70 jastaǵy aqsaqaldar otyratyn. Sol kezde Parlament qabyrǵasyna qashan jastar keler eken dep oilaityn edim. Mine, qazirgi jaǵdaidy men óte pozitivti faktor dep sanaimyn», - dedi Marat Báshimov elordada ótken «SAILAU-2021: Parlament sailaýynyń aldyn ala qorytyndylary» atty saraptamalyq talqylaýda.
Sarapshynyń aitýynsha, partiialar Parlamentke usynyp otyrǵan qazirgi azamattardyń kóbi azamattyq ustanymymen elge tanylǵan adamdar. Sol sebepti ol Parlament pen halyqtyń arasynda keri bailanys kúsheier degenge senim bildirdi.
Marat Báshimov keiingi jyldary atqarýshy biliktiń ashyqtyǵyna kóbirek kóz jetkizip kele jatqanyn aitady.
«Endigi kezekte osy Parlamenttiń túr-tulǵasy tolyǵymen ózgerer degen oidamyz. Azamattyq qoǵammen, Úkimettik emes uiymdarmen, BAQ-pen yntymaqtastyqty nyǵaitatyn Parlament bolar degen úmittemiz», - dedi Marat Báshimov.
