قىرعىزستاننىڭ بۇرىنعى پرەزيدەنتٸ المازبەك اتامباەۆتىڭ دەنساۋلىعىن سوت-مەديتسينالىق ساراپتاما ماماندارى تەكسەرەدٸ. 2019 جىلى كوي-تاشتا بولعان وقيعا بويىنشا ٸستٸ قاراپ جاتقان سۋديا سونداي شەشٸم شىعارعان.
سوت شەشٸمٸن قىرعىزستان سوتسيال-دەموكراتييالىق پارتيياسىنىڭ ٶكٸلٸ, ٸسكە قاتىسۋشىلاردىڭ بٸرٸ كۋندۋز جولدۋباەۆا حابارلادى. بۇل پارتييانى بۇرىن اتامباەۆ باسقارعان. پارتييا ٶكٸلٸنٸڭ سٶزٸنە قاراعاندا, كوي-تاشتاعى وقيعا بويىنشا ٸس ساراپتاما نەتيجەسٸ دايىن بولعانعا دەيٸن توقتاتىلعان, دەپ جازادى ازاتتىق.
قازٸر بۇرىنعى پرەزيدەنت المازبەك اتامباەۆ كولونييادا وتىر. ول 2020 جىلدىڭ جەلتوقسان ايىندا دەنساۋلىعىنا بايلانىستى تەرگەۋ يزولياتورىنان سول جاققا اۋىستىرىلعان. كەيٸنگٸ ايلاردا ول سوتقا مٷلدە قاتىسپاعان. ادۆوكاتتارى بۇلتارتپاس شاراسىن ٶزگەرتۋ تۋرالى بٸرنەشە رەت ٶتٸنٸش بەرگەن.
اتامباەۆ قىرعىزستاندى 2011 مەن 2017 جىلدارى ارالىعىندا باسقارعان. قىزمەتٸنەن كەتكەننەن كەيٸن وعان اۋىر قىلمىستار بويىنشا ايىپتار تاعىلدى. ول ٸستٸڭ ساياسيلانعانىن ايتىپ, ايىپتاردى جوققا شىعارادى.
2019 جىلى 7-8 تامىزدا كوي-تاشتا ەكس-پرەزيدەنت المازبەك اتامباەۆتى تەرگەۋگە كٷشپەن جەتكٸزۋ وپەراتسيياسى جٷرگٸزٸلگەن. ونى ٸٸم قىلمىستىق توپ جەتەكشٸسٸ باتۋكاەۆتىڭ زاڭسىز بوساتىلۋىنا قاتىستى تەرگەمەك بولعان. ونى كٷشپەن جەتكٸزۋ وپەراتسيياسى كەزٸندە ارنايى جاساق ٶكٸلٸ قازا بولدى, 200-دەن استام ادام جاراقاتتاندى.
ٸشكٸ ٸستەر مينيسترلٸگٸنٸڭ تەرگەۋ باسقارماسى 19 ادامعا ايىپ تاقتى. اراسىندا المازبەك اتامباەۆ تا بار. كوي-تاشتاعى وقيعادان بٶلەك, اتامباەۆقا بٸشكەك جىلۋ ەلەكتر ورتالىعىن جاڭارتۋ كەزٸندە اقشا جىمقىرۋ, قىلمىستىق جولمەن الىنعان كٸرٸستٸ زاڭداستىرۋ جەنە زاڭسىز بايۋ, "تەرەك" سٷرمە كەنٸشٸن زاڭسىز يەلەنۋگە قاتىستى ٸستەر بويىنشا ايىپ تاعىلعان.
2020 جىلى ماۋسىم ايىندا اتامباەۆ قىلمىستىق توپ جەتەكشٸسٸ ازيز باتۋكاەۆتى زاڭسىز بوساتۋ ٸسٸ بويىنشا كٸنەلٸ دەپ تانىلىپ, 11 جىلعا باس بوستاندىعىنان ايىرىلعان. 30 قاراشادا جوعارعى سوت الدىڭعى ينستانتسييادا شىققان سوت ٷكٸمٸنٸڭ كٷشٸن جويىپ, ٸستٸ بٸشكەك قالاسىنىڭ پەرۆوماي اۋداندىق سوتىنا قايتا قاراۋعا جٸبەرگەن.
