تانىمال ەزٸلكەش قايرات ەدٸلگەرەيدٸڭ جۇبايى باقىت تۇرمان ٶمٸردٸڭ ٶتكٸنشٸلٸگٸ مەن ادام ارتىندا قالدىراتىن مۇرا تۋرالى وي بٶلٸستٸ. ول ەر ادام كٶزٸ تٸرٸسٸندە دٷنيە-مٷلكٸنٸڭ كٸمگە قالاتىنىن انىقتاپ قويعانى دۇرىس دەپ ەسەپتەيدٸ, دەپ حابارلايدى ult.kz.

باقىت تۇرمان "نە دەيدٸ" باعدارلاماسىنا بەرگەن سۇحباتىندا كٶپشٸلٸك ايتا بەرمەيتٸن ٶلٸم تاقىرىبىن قوزعادى. ونىڭ پٸكٸرٸنشە, ادام ٶمٸردەن ٶتەتٸنٸن مويىنداپ, ارتىندا قالاتىن دٷنيەسٸنٸڭ تاعدىرىن الدىن الا ويلاستىرعانى جٶن.
"بارىڭدى قازٸر, كٶزٸڭنٸڭ تٸرٸسٸندە جازىپ قوي. بٸراق ول قاي كەزدە ٸسكە اسادى? سەن ٶلگەننەن كەيٸن. ول راسىمەن سولاي عوي", – دەدٸ ول.
ەزٸلكەشتٸڭ جۇبايى ەشكٸمنٸڭ قانشا ٶمٸر سٷرەتٸنٸن بٸلمەيتٸنٸن ايتىپ, مۇنداي مەسەلەگە قورقىنىشپەن ەمەس, شىنايى كٶزقاراسپەن قاراۋعا شاقىردى.
"بٸز بەرٸمٸز دە ٶلەمٸز. ونىڭ قاشان بولارىن ەشكٸم بٸلمەيدٸ. جاستار دا, ٷلكەندەر دە ەشكٸمنٸڭ ٶمٸرٸندە كەپٸل جوق قوي. سوندىقتان دا ماعان وسىنداي وي كەلدٸ. قازٸر نە بار سەندە سونى جازىپ قويۋىڭ كەرەك. اياقاستى بٸردەمە بولىپ, ٶلٸپ كەتسەڭ دەگەندەي. ونداي نەرسەدەن قورىقپاۋ كەرەك. وعان شىنايى كٶزقاراسپەن قاراۋ كەرەك", – دەدٸ باقىت تۇرمان.
ول مۇرا قالدىرۋ ٷشٸن مٸندەتتٸ تٷردە باي بولۋدىڭ قاجەتٸ جوق ەكەنٸن دە اتاپ ٶتتٸ. ايتۋىنشا, ادامنىڭ ارتىندا قالاتىن دٷنيەسٸ قانشالىقتى قىمبات نەمەسە ارزان بولسا دا, ونىڭ كەيٸنگٸ تاعدىرىن الدىن الا شەشٸپ قويعان دۇرىس.
"مەن ٶمٸرگە شىنايى قارايمىن. ارتىڭدا قالعان دٷنيە نە بولسا دا, شٸرٸگەن ٷيٸڭ, موتوتسيكل قالسا دا ونى مۇرا رەتٸندە قالدىرۋىڭ كەرەك", – دەپ تٷيٸندەدٸ ول.
وسىلايشا باقىت تۇرمان مۇرا مەسەلەسٸن تەك قارتايعان كەزدە ويلاناتىن شارۋا دەپ قاراماۋعا شاقىردى. ونىڭ سٶزٸنشە, ٶمٸردە كٷتپەگەن جاعدايلار بولۋى مٷمكٸن, سوندىقتان ادام ٶزٸنەن كەيٸن قالاتىن دٷنيەگە قاتىستى شەشٸمدٸ كٶزٸ تٸرٸسٸندە قابىلداعانى جٶن.