قر كلينيكالىق جەنە ٸرگەلٸ مەديتسينا اكادەميگٸ, اسفەنديياروۆ اتىنداعى قازۇمۋ ەپيدەميولوگييا كافەدراسىنىڭ پروفەسسورى سەكەن ەمٸرەەۆ ونلاين بريفينگ بارىسىندا كوروناۆيرۋسكە قارسى ۆاكتسينانىڭ قورعانىش كٷشٸ قانشا ۋاقىتقا جەتەتٸنٸن ايتتى, دەپ حابارلايدى قازاقپارات.
سپيكەردٸڭ ايتۋىنشا, كوروناۆيرۋسقا قارسى ۆاكتسينانىڭ پايدا بولعانىنا كٶپ ۋاقىت بولعان جوق, سوندىقتان ونىڭ قورعانىش كٷشٸ قانشا ۋاقىتقا جەتەتٸنٸن ەشكٸم ناقتى ايتا المايدى. ەڭ باستىسى ۆاكتسينانىڭ قورعانىش كٷشٸ بار.
«قازٸر بٸزدە سالىنىپ جاتقان ەكپەلەردٸڭ قورعانىش كٷشٸ بار, ول تولىق انىقتالعان. الايدا ەكپە سالعان سوڭ تٷزٸلەتٸن انتيدەنە قانشا ۋاقىتقا جەتەتٸنٸ بەلگٸسٸز. قورعانىس يممۋنيتەتٸ بٸر نەمەسە ەكٸ جىلعا جەتەدٸ دەپ ەشكٸم ناقتى ايتا المايدى. ۆاكتسينا ٶندٸرۋشٸلەردٸڭ ٶزٸ شامالاپ قانا ايتادى. «سپۋتنيك V» ۆاكتسيناسى 2021 جىلدىڭ باسىندا عانا شىقتى. سوندىقتان قازٸر ۆاكتسينا قانشا ۋاقىتقا دەيٸن قورعايتىنىن ەشكٸم ايتا المايدى. ول ۋاقىت ٶتە كەلە بەلگٸلٸ بولادى. باستىسى ونىڭ قورعانىش كٷشٸ بار»,- دەدٸ سەكەن ەمٸرەەۆ.
سونىمەن قاتار, ول كوروناۆيرۋستان قورعانۋدىڭ جالعىز جولى ەكپە ەكەنٸن ايتتى.
«قازٸر كٷندە وسى ۆيرۋستان كٶز جۇمىپ جاتقاندار بار. بۇل ٸندەتتٸڭ الدىن الۋ ٷشٸن ۆاكتسينا سالعان دۇرىس. عالىمدار الداعى ۋاقىتتا بٸر رەت سالعان سوڭ ٶمٸر بويىنا ساقتايتىن ۆاكتسينا جاساپ شىعارادى دەگەن ويدامىن, بۇل ەزٸرگە تەك ارمان بولىپ وتىر»,-دەدٸ پروفەسسور.
