قازاقستاندا حالىق ساناعى 2020 جىلى قازان ايىندا ٶتەدٸ. وعان بيۋدجەتتەن 8,2 ملرد تەڭگە بٶلٸنەدٸ, دەپ حابارلادى ۇلتتىق ەكونوميكا مينيسترلٸگٸنە قارايتىن ستاتيستيكا كوميتەتٸنٸڭ تٶراعاسى نۇربولات ايداپكەلوۆ.
ونىڭ ايتۋىنشا, حالىق ساناعىن ٶتكٸزۋ ٷشٸن 32,5 مىڭ ادام تارتىلادى, بيۋدجەتتٸڭ نەگٸزگٸ بٶلٸگٸ ياعني, 3,7 ملرد تەڭگە سولاردىڭ جۇمىسىنا تٶلەنەدٸ.
- بيۋدجەتتٸڭ نەگٸزگٸ بٶلٸگٸ - 3,7 ملرد تەڭگە ينتەرۆيۋەرلەردٸڭ ەڭبەكقاسىن تٶلەۋگە جۇمسالادى. بۇعان قوسا ساناققا بايلانىستى ونلاين رەسۋرستار جاسالادى. اقپاراتتىق جٷيە قۇردىق. ەر وبلىس ورتالىعىندا حالىق ساناعى ٷشٸن باسقارما اشىلادى, - دەدٸ حالىق ساناعىنىڭ بيۋدجەتٸ تۋرالى سۇراقتارعا جاۋاپ بەرگەن نۇربولات ايداپكەلوۆ. ونىڭ ايتۋىنشا, پلانشەت ساتىپ الۋعا 1 ملرد تەڭگە قاراجات بٶلٸنبەك. "بيۋدجەت تۋرالى تولىق كەستە ارنايى سايتتا جارييالانادى" دەدٸ ول.
ول مۇعالٸمدەر مەن دەرٸگەرلەردٸڭ حالىق ساناعى جۇمىسىنا قاتىسپايتىنىن, حالىقتان ساۋالناما جينايتىن ادامدار ارنايى ٸرٸكتەلٸنٸپ, كۋرستاردان ٶتەتٸنٸن ايتتى.
جالپى ساناق ەكٸ كەزەڭنەن تۇرادى. 1-30 ماۋسىم ارالىعىندا ينتەرۆيۋەرلەر تۇرعىن ٷيلەر مەن عيماراتتاردى ارالاپ, وندا تۇراتىن ادامدار سانىن انىقتايدى. ساناقتىڭ ەكٸنشٸ كەزەڭٸندە ياعني, 1-30 قازان ارالىعىندا ساناق جٷرگٸزٸلەدٸ. وعان ونلاين تٷردە دە قاتىسۋعا بولادى. ساۋالناما اياقتالعاندا ەربٸر ازاماتقا حالىق ساناعىنان ٶتكەنٸ تۋرالى انىقتاما بەرٸلەدٸ.
زاڭعا ساي, قازاقستاندا ساناق ەر ون جىلدا بٸر رەت ٶتۋٸ تيٸس. سوڭعى رەت حالىق ساناعى 2009 جىلى ٶتكەن.
