Qazaqstanda halyq sanaǵy 2020 jyly qazan aiynda ótedi. Oǵan biýdjetten 8,2 mlrd teńge bólinedi, dep habarlady ulttyq ekonomika ministrligine qaraityn statistika komitetiniń tóraǵasy Nurbolat Aidapkelov.
Onyń aitýynsha, halyq sanaǵyn ótkizý úshin 32,5 myń adam tartylady, biýdjettiń negizgi bóligi iaǵni, 3,7 mlrd teńge solardyń jumysyna tólenedi.
- Biýdjettiń negizgi bóligi - 3,7 mlrd teńge interviýerlerdiń eńbekqasyn tóleýge jumsalady. Buǵan qosa sanaqqa bailanysty onlain resýrstar jasalady. Aqparattyq júie qurdyq. Ár oblys ortalyǵynda halyq sanaǵy úshin basqarma ashylady, - dedi halyq sanaǵynyń biýdjeti týraly suraqtarǵa jaýap bergen Nurbolat Aidapkelov. Onyń aitýynsha, planshet satyp alýǵa 1 mlrd teńge qarajat bólinbek. "Biýdjet týraly tolyq keste arnaiy saitta jariialanady" dedi ol.
Ol muǵalimder men dárigerlerdiń halyq sanaǵy jumysyna qatyspaitynyn, halyqtan saýalnama jinaityn adamdar arnaiy iriktelinip, kýrstardan ótetinin aitty.
Jalpy sanaq eki kezeńnen turady. 1-30 maýsym aralyǵynda interviýerler turǵyn úiler men ǵimarattardy aralap, onda turatyn adamdar sanyn anyqtaidy. Sanaqtyń ekinshi kezeńinde iaǵni, 1-30 qazan aralyǵynda sanaq júrgiziledi. Oǵan onlain túrde de qatysýǵa bolady. Saýalnama aiaqtalǵanda árbir azamatqa halyq sanaǵynan ótkeni týraly anyqtama beriledi.
Zańǵa sai, Qazaqstanda sanaq ár on jylda bir ret ótýi tiis. Sońǵy ret halyq sanaǵy 2009 jyly ótken.
