قازاقستاندىق تەننيسشٸلەردٸڭ ەبۋ-دابي WTA 500 تۋرنيرٸندەگٸ قارسىلاستارى بەلگٸلٸ بولدى, دەپ حابارلايدى "ۇلت اقپارات".
ەيەلدەر تەننيسٸ قاۋىمداستىعى (WTA) بيىل العاش رەت ۇيىمداستىرىپ وتىرعان دودا 5-13 قاڭتار ارالىعىندا ٶتەدٸ.
جارىستىڭ جٷلدە قورى 565 530 اقش دوللارىن قۇرايدى.
ەبۋ-دابيدٸڭ نەگٸزگٸ تۋرنيرٸنە قازاقستاننان تٶرت تەننيسشٸ قاتىسادى. وعان قوسا اننا دانيلينا بٷگٸن ٸرٸكتەۋ سايىسىندا قىتايلىق يان چجاوسيۋانمەن كٷش سىناسادى. ەگەر ول ٸرٸكتەۋ سايىستارىنان ٶتسە, نەگٸزگٸ جارىسقا جولداما الادى.
قازاقستاننىڭ بٸرٸنشٸ, ەلەمنٸڭ 19-ىنشى, وسى تۋرنيردٸڭ 6-راكەتكاسى ەلەنا رىباكينا العاشقى اينالىمدا ٸرٸكتەۋ سايىستارى جەڭٸمپازدارىنىڭ بٸرەۋٸمەن كەزدەسەدٸ. سونداي-اق ياروسلاۆا شۆەدوۆانىڭ دا قارسىلاسى ەزٸرگە بەلگٸسٸز.
دٷنيەجٷزٸلٸك رەيتينگتە 28-ساتىدا تۇرعان, وسى تۋرنيردٸڭ 13-راكەتكاسى بولىپ تٸركەلگەن يۋلييا پۋتينتسەۆا يتالييالىق مارتينا ترەۆيزانمەن كورتقا شىعادى. م.ترەۆيزان ٶتكەن جىلى رولان گارروس تۋرنيرٸندە اسا تابىستى ٶنەر كٶرسەتٸپ, سونىڭ نەتيجەسٸندە ٷزدٸك جٷزدٸككە ەندٸ, قازٸر ول 85-ورىندا تۇر.
زارينا ديياس بٸرٸنشٸ اينالىمدا ەلەمنٸڭ 33-ٸنشٸ, تۋرنيردٸڭ 17-راكەتكاسى, رەسەيلٸك ەكاتەرينا الەكساندروۆامەن شەبەرلٸك بايقاسادى.
ەبۋ-دابيدەگٸ نەگٸزگٸ تۋرنير 6 قاڭتار كٷنٸ باستالادى.
