قازاقستان كوروناۆيرۋسقا قارسى ۆاكتسينالار تولىق سىناقتان ٶتپەيٸنشە ولاردى ساتىپ المايدى. بۇل جاقىندا عانا تٸركەلگەنٸ حابارلانعان رەسەيلٸك ۆاكتسيناعا دا قاتىستى. دەنساۋلىق ساقتاۋ مينيسترلٸگٸنٸڭ رەسمي ٶكٸلٸ باعدات قوجاحمەتوۆ Sputnik كازاحستان سايتىنا وسىلاي دەپ مەلٸمدەگەن.
وسى اپتادا رەسەي پرەزيدەنتٸ ۆلاديمير پۋتين رەسەيدٸڭ ەلەمدە بٸرٸنشٸ بولىپ كوروناۆيرۋس ينفەكتسيياسىنا قارسى ۆاكتسينانى تٸركەگەنٸن حابارلاعان ەدٸ. ال كەيبٸر باتىس ساراپشىلارى مەن جەرگٸلٸكتٸ ماماندار سىناقتان تولىق ٶتپەگەن ۆاكتسينانىڭ قاۋٸپسٸزدٸگٸنە كٷمەن كەلتٸرگەن بولاتىن.
"قازٸرگٸ كەزدە قازاقستان ۆاكتسينا ساتىپ الۋ بويىنشا بٸردە-بٸر كەلٸسٸم-شارت جاساسقان جوق, سەبەبٸ ۆاكتسينالار سوڭعى تٶرتٸنشٸ كەزەڭنەن ٶتكەن جوق. ۆاكتسينانى ساتىپ الۋ ٷشٸن ول حالىقارالىق سەرتيفتيكاتتاۋدان ٶتۋٸ تيٸس. سوندىقتان دا بۇل مەسەلەگە قاتىستى ەشقانداي شەشٸم جوق" دەدٸ قوجاحمەتوۆ.
بۇعان دەيٸن دٷنيەجٷزٸلٸك دەنساۋلىق ساقتاۋ ۇيىمىنىڭ ٶكٸلٸ تاريك ياسارەۆيچ رەسەيلٸك گامالەي اتىنداعى ينستيتۋت ەزٸرلەگەن كوروناۆيرۋس ۆاكتسيناسىن كٶپشٸلٸككە قولدانۋعا كەڭەس بەرۋ ٷشٸن ەۋەلٸ ونىڭ تيٸمدٸلٸگٸ مەن قاۋٸپسٸزدٸگٸنە كٶز جەتكٸزۋٸمٸز قاجەت دەگەن بولاتىن. رەسەيلٸك زەرتتەۋ ۇيىمدارى مەن دەرٸ-دەرمەك كومپانييالارىنىڭ باسىن بٸرٸكتٸرگەن قاۋىمداستىق ٶكٸلدەرٸ دە "ۆاكتسينانى جىلدام تٸركەۋ رەسەيدٸ كٶشباسشىعا اينالدىرمايدى, بۇل تەك ۆاكتسينا قولداناتىن قاراپايىم ازاماتتارعا قاۋٸپ تٶندٸرۋٸ مٷمكٸن" دەگەن ەدٸ.
سوڭعى اقپاراتتار بويىنشا, تولىق سىناقتان ٶتپەسە دە, تٸركەۋدەن ٶتكەن ۆاكتسينا قىركٷيەك ايىندا مەديتسينا قىزمەتكەرلەرٸنە ەگٸلە باستايدى. ال كٶپشٸلٸككە قولدانۋعا 2021 جىلدىڭ قاڭتار ايىندا بەرٸلەدٸ.
باعدات قوجاحمەتوۆتٸڭ ايتۋىنشا, قازاقستان ۆاكتسينا جەنە يممۋنيزاتسييا جٶنٸندەگٸ عالامدىق اليانسقا قوسىلسا, بۇل ۇيىمعا مٷشە مەملەكەتتەر 2020 جىلدىڭ 31 تامىزىنا دەيٸن العاشقى جارناسىن (15 پايىز) تٶلەۋگە مٸندەتتٸ. بۇدان سوڭ ۆاكتسينانىڭ جەتۋٸنە قاراي حالىقتىڭ 20 پايىزىنا جەتەتٸندەي ۆاكتسينا قۇنىن تولىق تٶلەۋٸ تيٸس بولادى. قازاقستان اليانسقا قوسىلۋعا كەلٸسٸم بەرگەنمەن ەزٸرگە ۇيىممەن كەلٸسٸم-شارتقا قول قويىلماعان.
