Qazaqstan koronavirýsqa qarsy vaktsinalar tolyq synaqtan ótpeiinshe olardy satyp almaidy. Bul jaqynda ǵana tirkelgeni habarlanǵan reseilik vaktsinaǵa da qatysty. Densaýlyq saqtaý ministrliginiń resmi ókili Baǵdat Qojahmetov Sputnik Kazahstan saityna osylai dep málimdegen.
Osy aptada Resei prezidenti Vladimir Pýtin Reseidiń álemde birinshi bolyp koronavirýs infektsiiasyna qarsy vaktsinany tirkegenin habarlaǵan edi. Al keibir batys sarapshylary men jergilikti mamandar synaqtan tolyq ótpegen vaktsinanyń qaýipsizdigine kúmán keltirgen bolatyn.
"Qazirgi kezde Qazaqstan vaktsina satyp alý boiynsha birde-bir kelisim-shart jasasqan joq, sebebi vaktsinalar sońǵy tórtinshi kezeńnen ótken joq. Vaktsinany satyp alý úshin ol halyqaralyq sertiftikattaýdan ótýi tiis. Sondyqtan da bul máselege qatysty eshqandai sheshim joq" dedi Qojahmetov.
Buǵan deiin Dúniejúzilik densaýlyq saqtaý uiymynyń ókili Tarik Iasarevich reseilik Gamalei atyndaǵy institýt ázirlegen koronavirýs vaktsinasyn kópshilikke qoldanýǵa keńes berý úshin áýeli onyń tiimdiligi men qaýipsizdigine kóz jetkizýimiz qajet degen bolatyn. Reseilik zertteý uiymdary men dári-dármek kompaniialarynyń basyn biriktirgen qaýymdastyq ókilderi de "vaktsinany jyldam tirkeý Reseidi kóshbasshyǵa ainaldyrmaidy, bul tek vaktsina qoldanatyn qarapaiym azamattarǵa qaýip tóndirýi múmkin" degen edi.
Sońǵy aqparattar boiynsha, tolyq synaqtan ótpese de, tirkeýden ótken vaktsina qyrkúiek aiynda meditsina qyzmetkerlerine egile bastaidy. Al kópshilikke qoldanýǵa 2021 jyldyń qańtar aiynda beriledi.
Baǵdat Qojahmetovtiń aitýynsha, Qazaqstan vaktsina jáne immýnizatsiia jónindegi ǵalamdyq aliansqa qosylsa, bul uiymǵa múshe memleketter 2020 jyldyń 31 tamyzyna deiin alǵashqy jarnasyn (15 paiyz) tóleýge mindetti. Budan soń vaktsinanyń jetýine qarai halyqtyń 20 paiyzyna jetetindei vaktsina qunyn tolyq tóleýi tiis bolady. Qazaqstan aliansqa qosylýǵa kelisim bergenmen ázirge uiymmen kelisim-shartqa qol qoiylmaǵan.
