يراننىڭ گيليان پروۆينتسيياسىندا "نامىس ٷشٸن" 14 جاسار قىزىن بالتالاپ ٶلتٸرگەن ازامات توعىز جىلعا سوتتالدى. ٷكٸم 28 تامىز كٷنٸ كەسٸلدٸ. بۇل تۋرالى ILNA اقپاراتتىق اگەنتتٸگٸ حابارلادى. اگەنتتٸكتٸڭ مەلٸمەتٸنشە, مارقۇمنىڭ اناسى ٷكٸمدٸ قايتا قاراپ, ايىپتالۋشىنى ٶلٸم جازاسىنا كەسۋدٸ سۇراعان.
"سوت بيلٸگٸ بۇل ٸسكە "ەرەكشە كٶڭٸل" بٶلٸنٸپ جاتىر دەپ مەلٸمدەگەن ەدٸ, بٸراق ٷكٸم مەنٸ جەنە وتباسىمدى دٷرلٸكتٸردٸ" دەدٸ مارقمۇم قىزدىڭ اناسى رانا داشتي ILNA اگەنتتٸگٸنە. داشتي وتباسىنىڭ ٶزگە مٷشەلەرٸنە الاڭدايتىنىن ايتتى.
21 مامىر كٷنٸ بولعان بۇل وقيعا ەلدٸڭ نارازىلىعىن تۋدىردى. يران پرەزيدەنتٸ حاسان روحاني قىزدىڭ ٶلتٸرٸلۋٸنە ٶكٸنٸش بٸلدٸرٸپ, زورلىق-زومبىلىققا قارسى بٸرقاتار زاڭدى جەدەل قابىلداۋعا شاقىردى.
يران باسىلىمدارىنىڭ حابارلاۋىنشا, مارقۇم رومينا ٶزٸنەن 15 جاس ٷلكەن ەر ازاماتقا كٷيەۋگە شىعۋىنا ەكەسٸ رۇقسات بەرمەگەن سوڭ, ٷيٸنەن قاشىپ كەتكەن.
بيلٸك ورگاندارى قىزدى ۇستاپ, ٷيٸنە قايتارعان. ونىڭ ٶز ٶمٸرٸ ٷشٸن قاۋٸپتەنەتٸنٸن ەلەمەگەن. رومينا ٷيٸنە كەلٸپ, ۇيىقتاپ جاتقاندا ەكەسٸ ونى بالتالاپ ٶلتٸرگەن. قىلمىس وتباسىنىڭ گيلانداعى ٷيٸندە بولعان.
جەرگٸلٸكتٸ باسىلىمداردىڭ حابارلاۋىنشا, رومينا تۇرمىس قۇرعىسى كەلگەن ەر ازامات ەكٸ جىلعا سوتتالعان. قانداي ايىپ تاعىلعانى ايتىلمايدى.
يراندا كٸسٸ ٶلتٸرگەن ادام نە ٶمٸر بويىنا باس بوستاندىعىنا ايىرىلادى نە ٶلٸم جازاسىنا كەسٸلەدٸ. الايدا "نامىس" ٷشٸن كٸسٸ ٶلتٸرگەن ادام ون جىلعا دەيٸن باس بوستاندىعىنان ايىرىلادى.
