Irannyń Gilian provintsiiasynda "namys úshin" 14 jasar qyzyn baltalap óltirgen azamat toǵyz jylǵa sottaldy. Úkim 28 tamyz kúni kesildi. Bul týraly ILNA aqparattyq agenttigi habarlady. Agenttiktiń málimetinshe, marqumnyń anasy úkimdi qaita qarap, aiyptalýshyny ólim jazasyna kesýdi suraǵan.
"Sot biligi bul iske "erekshe kóńil" bólinip jatyr dep málimdegen edi, biraq úkim meni jáne otbasymdy dúrliktirdi" dedi marqmum qyzdyń anasy Rana Dashti ILNA agenttigine. Dashti otbasynyń ózge múshelerine alańdaitynyn aitty.
21 mamyr kúni bolǵan bul oqiǵa eldiń narazylyǵyn týdyrdy. Iran prezidenti Hasan Rohani qyzdyń óltirilýine ókinish bildirip, zorlyq-zombylyqqa qarsy birqatar zańdy jedel qabyldaýǵa shaqyrdy.
Iran basylymdarynyń habarlaýynsha, marqum Romina ózinen 15 jas úlken er azamatqa kúieýge shyǵýyna ákesi ruqsat bermegen soń, úiinen qashyp ketken.
Bilik organdary qyzdy ustap, úiine qaitarǵan. Onyń óz ómiri úshin qaýiptenetinin elemegen. Romina úiine kelip, uiyqtap jatqanda ákesi ony baltalap óltirgen. Qylmys otbasynyń Gilandaǵy úiinde bolǵan.
Jergilikti basylymdardyń habarlaýynsha, Romina turmys qurǵysy kelgen er azamat eki jylǵa sottalǵan. Qandai aiyp taǵylǵany aitylmaidy.
Iranda kisi óltirgen adam ne ómir boiyna bas bostandyǵyna aiyrylady ne ólim jazasyna kesiledi. Alaida "namys" úshin kisi óltirgen adam on jylǵa deiin bas bostandyǵynan aiyrylady.
