فرانتسييا پرەزيدەنتٸ ەممانۋەل ماكرون رەسەي تٷرمەسٸندە بەس جىل وتىرىپ, ۋكراينا مەن رەسەي اراسىنداعى "تۇتقىن الماسۋ" كەلٸسٸمٸنەن كەيٸن جاقىندا بوساپ شىققان ۋكراينالىق رەجيسسەر ولەگ سەنتسوۆپەن كەزدەستٸ. كەزدەسۋ ستراسبۋرگ قالاسىندا ەۋروپا كەڭەسٸنٸڭ پارلامەنتتٸك اسسامبلەياسى (پاسە) وتىرىسى قارساڭىندا بولعان.
ۋكراينانىڭ "پەرشيي" ارناسى كەزدەسۋدەن ۆيدەو جارييالادى. ۆيدەودا ماكروننىڭ ەۋەلٸ سەنتسوۆتان شىعارماشىلىق جوسپارى تۋرالى سۇراعانى كٶرٸنەدٸ. رەجيسسەر كينو سالاسىنا ورالىپ, كٸتاپ جازباق ويى بار ەكەنٸن, بٸراق قازٸر بۇل جوسپارىنىڭ كەيٸنگە شەگەرٸلگەنٸن ايتادى.
AFP جازۋىنشا, سەنتسوۆ ماكرونعا تٷرمەدە وتىرعان كەزدە جاعدايىنا الاڭداپ, قولداۋ كٶرسەتكەنٸ ٷشٸن العىس ايتقان. كەزدەسۋدە رەسەي تٷرمەسٸندە قالعان ۋكراينالىقتاردىڭ جاعدايى دا سٶز بولعان.
فرانتسييا بيلٸگٸ مەن ازاماتتىق قوعامى ٶتكەن جىلى رەسەي تٷرمەسٸندە ۋكراينا تۇتقىندارىن بوساتۋدى تالاپ ەتٸپ, بٸرنەشە اي اشتىق ۇستاعان سەنتسوۆتى قولداعان. وعان سول كەزدە پاريجدٸڭ قۇرمەتتٸ ازاماتى اتاعى بەرٸلدٸ. ەۋروپارلامەنتتٸڭ شەشٸمٸمەن ساحاروۆ اتىنداعى سىيلىققا يە بولدى.
سەنتسوۆپەن كەزدەسۋدەن كەيٸن ماكرون ەۋروپا كەڭەسٸنٸڭ پارلامەنتتٸك اسسەمبلەياسى وتىرىسىنا قاتىسقان. ماكرون جيىندا سەنتسوۆتى "ٶزگە ازاماتتاردىڭ بوستاندىعىن ٶز بوستاندىعىنان كەم كٶرمەيتٸن" "ەۋروپانىڭ ۇلى ازاماتى" دەپ اتاعان.
بۇعان قوسا, ماكرون ەۋروپا تۇتاستىعىن ساقتاۋ ٷشٸن مەسكەۋمەن دە ديالوگ ورناتۋدىڭ ماڭىزدىلىعىن اتاپ ٶتكەن. رەسەيلٸك دەلەگاتسييانىڭ پاسە جيىنىنا قاتىسۋىن شەكتەيتٸن شارانى الىپ تاستاۋدى قولداعان. فرانتسييا پرەزيدەنتٸ مەسكەۋدە شەرۋشٸلەرگە كٷش قولدانۋ مەسەلەسٸنە دە الاڭدايتىنىن بٸلدٸرگەن.
ولەگ سەنتسوۆ - رەسەيدٸڭ قىرىمدى اننەكسييالاۋىنا قارسىلىق بٸلدٸرگەن ۋكراينا ازاماتى. رەسەي بيلٸگٸ ونى تەراكت ۇيىمداستىرماق بولدى دەپ ايىپتاپ, 20 جىلعا سوتتاعان. سەنتسوۆ تاعىلعان ايىپتى مويىنداماعان.
ازاتتىق
