Frantsiia prezidenti Emmanýel Makron Resei túrmesinde bes jyl otyryp, Ýkraina men Resei arasyndaǵy "tutqyn almasý" kelisiminen keiin jaqynda bosap shyqqan ýkrainalyq rejisser Oleg Sentsovpen kezdesti. Kezdesý Strasbýrg qalasynda Eýropa keńesiniń parlamenttik assambleiasy (PASE) otyrysy qarsańynda bolǵan.
Ýkrainanyń "Pershii" arnasy kezdesýden video jariialady. Videoda Makronnyń áýeli Sentsovtan shyǵarmashylyq jospary týraly suraǵany kórinedi. Rejisser kino salasyna oralyp, kitap jazbaq oiy bar ekenin, biraq qazir bul josparynyń keiinge shegerilgenin aitady.
AFP jazýynsha, Sentsov Makronǵa túrmede otyrǵan kezde jaǵdaiyna alańdap, qoldaý kórsetkeni úshin alǵys aitqan. Kezdesýde Resei túrmesinde qalǵan ýkrainalyqtardyń jaǵdaiy da sóz bolǵan.
Frantsiia biligi men azamattyq qoǵamy ótken jyly Resei túrmesinde Ýkraina tutqyndaryn bosatýdy talap etip, birneshe ai ashtyq ustaǵan Sentsovty qoldaǵan. Oǵan sol kezde Parijdiń qurmetti azamaty ataǵy berildi. Eýroparlamenttiń sheshimimen Saharov atyndaǵy syilyqqa ie boldy.
Sentsovpen kezdesýden keiin Makron Eýropa keńesiniń parlamenttik assembleiasy otyrysyna qatysqan. Makron jiynda Sentsovty "ózge azamattardyń bostandyǵyn óz bostandyǵynan kem kórmeitin" "Eýropanyń uly azamaty" dep ataǵan.
Buǵan qosa, Makron Eýropa tutastyǵyn saqtaý úshin Máskeýmen de dialog ornatýdyń mańyzdylyǵyn atap ótken. Reseilik delegatsiianyń PASE jiynyna qatysýyn shekteitin sharany alyp tastaýdy qoldaǵan. Frantsiia prezidenti Máskeýde sherýshilerge kúsh qoldaný máselesine de alańdaitynyn bildirgen.
Oleg Sentsov - Reseidiń Qyrymdy anneksiialaýyna qarsylyq bildirgen Ýkraina azamaty. Resei biligi ony terakt uiymdastyrmaq boldy dep aiyptap, 20 jylǵa sottaǵan. Sentsov taǵylǵan aiypty moiyndamaǵan.
Azattyq
