بٷگٸن فرانتسييانىڭ دەنساۋلىق ساقتاۋ مينيسترٸ وليۆە ۆەران ۇلتتىق ۆاكتسينالاۋ ستراتەگيياسىنا ەنگٸزٸلگەن ٶزگەرٸستەر تۋرالى ايتتى, دەپ حابارلايدى "ۇلت اقپارات".
فرانتسييا ٷكٸمەتٸن سوڭعى كەزدەرٸ حالىقتى ۆاكتسينالاۋ ٷدەرٸسٸنٸڭ سىلبىرلىعى ٷشٸن جەرگٸلٸكتٸ قوعامداستىق قاتتى سىناپ جٷر. قارتتار ٷيٸندەگٸ ازاماتتاردى ۆاكتسينالاۋدى قاراستىراتىن بٸرٸنشٸ فازانى دەنساۋلىق ساقتاۋ مينيسترلٸگٸ تىم باياۋلاتىپ جٸبەردٸ.
ۆەدومستۆو ٶكٸلدەرٸ ۆاكتسينا دوزاسىن جٸبەرمەي تۇرىپ, مەكەمەلەردەن ەكپە العىسى كەلەتٸن ازاماتتاردىڭ تٸزٸمٸن جٸبەرۋدٸ سۇراعان. قارتتار ٷيٸ تۇرعىندارىنىڭ كەلٸسٸمٸن الۋمەن بايلانىستى جاعدايدىڭ كٷردەلەنٸپ كەتۋٸ, ۆاكتسينا الدىنداعى مەديتسينالىق تەكسەرۋلەر دە بۇل ٷدەرٸستٸ تەجەي تٷستٸ.
«كٶپ ادامداردىڭ ۆاكتسينا الۋعا دەگەن قۇقىعى كەڭەيەدٸ, تٸركەۋ پروتسەدۋرالارى دا جەڭٸلدەيدٸ», - دەدٸ فرانتسييا تەلەۆيزيياسىنىڭ ەفيرٸندە دەنساۋلىق ساقتاۋ مينيسترٸ.
ەندٸ فرانتسييادا پرەپاراتتى ٷيدەن قىزمەت كٶرسەتەتٸن مەديتسينا ماماندارى مەن 50-دەن اسقان ٶرت سٶندٸرۋشٸلەر دە الا الادى. بۇعان دەيٸن وسى كاتەگوريياداعى ازاماتتار فرانتسيياداعى بەسدەڭگەيلٸ ۆاكتسينالاۋ جوسپارىنىڭ ەكٸنشٸ بٶلٸگٸنە كٸرگەن.
«ۆاكتسينا العان ازاماتتار سانى الداعى بٸرنەشە كٷندە بٸزدٸڭ كٶرشٸلەرٸمٸزدٸ باسىپ وزادى», - دەدٸ و.ۆەران.
ونىڭ سٶزٸنشە, اپتانىڭ ورتاسىنا تامان تاعى 100 اۋرۋحانا ۆاكتسينالاۋعا دايىن بولادى, سونداي-اق 100 ۆاكتسينالاۋ ورتالىعى بيىلعى جىلدىڭ قاڭتارىندا اشىلادى.
