ەلوردادا وميكرون شتامى ٶرشٸپ تۇر. بۇل تۋرالى نۇر-سۇلتان قالاسىنىڭ باس سانيتار دەرٸگەرٸ سارحات بەيسەنوۆا ايتتى, دەپ حابارلايدى قازاقپارات.
«اۋرۋدىڭ ٶرشۋٸنە بايلانىستى جىل باسىندا ناۋقاستاردان الىنعان 51 پتر-دٸڭ وڭ سىناماسىنا سەكۆەنيرلەۋ جٷرگٸزٸلدٸ. نەتيجەسٸندە وميكرون شتامى كوروناۆيرۋسپەن اۋىرعان ەلوردالىقتاردىڭ 70,6 پايىزىنان, ال دەلتا شتامى 29,4 پايىزىنان تابىلدى. وسىلايشا, ەلوردادا وميكرون شتامىنىڭ اينالىمى باسىمدىققا يە. بٸراق, دەلتا شتاممى كەزٸندە اۋرۋدىڭ ٶتە اۋىر فورمادا ٶتەتٸنٸن, ٶلٸم-جٸتٸم كٶرسەتكٸشٸ جوعارى ەكەندٸگٸن ەستەن شىعارماۋ قاجەت», - دەدٸ سارحات بەيسەنوۆا ەلوردا ەكٸمدٸگٸندە ۇيىمداستىرىلعان بريفينگ بارىسىندا.
ونىڭ اتاپ ٶتۋٸنشە, كوروناۆيرۋسپەن اۋىرعانداردى بارىنشا انىقتاۋ ماقساتىندا قالادا 24 زەرتحانا جۇمىس ٸستەپ تۇر.
ولار كٷن سايىن 5 مىڭنان 11 مىڭعا دەيٸن پتر-تەستٸ جاسالادى.
جالپى, جىل باسىنان بەرٸ ەلوردادا 295 844 زەرتتەۋ جٷرگٸزٸلٸپ, 84 310 ناۋقاس انىقتالدى.
«قالادا اۋرۋدىڭ تٶمەندەۋٸ ەڭ الدىمەن حالىقتىڭ ۇجىمدىق يممۋنيتەتكە جاقىنداۋىنا بايلانىستى. ياعني, ۆاكتسينا العان تۇرعىنداردىڭ, اۋىرىپ جازىلعانداردىڭ ٷلەسٸ ۇلعايدى. ەلوردادا قازٸرگٸ ۋاقىتتا ۆاكتسينانىڭ 1-كومپونەنتٸن سالدىرعاندار سانى - 503 967, ەكٸنشٸ كومپوننەنت - 471 619 ادام. ونىڭ ٸشٸندە 73 885 ادام رەۆاكتسينا الدى», - دەدٸ باس سانيتار دەرٸگەر.
