پرەزيدەنت نۇرسۇلتان نازارباەۆ ەنەرگەتيكا مينيسترلٸگٸنە تۇتىنۋشىلار ٷشٸن ەلەكتر ەنەرگيياسىنىڭ قۇنىن ارزانداتۋدى تاپسىردى, دەپ حابارلايدى قازاقپارات.
«بٸرىڭعاي ساتىپ الۋشىنىڭ مودەلٸن ەنگٸزۋ مەن ٶڭٸرلٸك ەلەكتر جەلٸلٸك كومپانييالاردى ٸرٸلەندٸرۋ جوسپارلانۋدا. ەنەرگەتيكا مينيسترٸ بۇل شارالار جاقسى نەتيجە بەرەتٸنٸن, تۇتىنۋشى ٷشٸن ەلەكتر ەنەرگيياسى قۇنىن تٶمەندەتەتٸنٸن بايانداعان بولاتىن. الايدا بۇعان قول جەتكەن جوق», - دەدٸ پرەزيدەنت قر ەنەرگەتيكا مينيسترٸ قانات بوزىمباەۆقا قاراتىپ ايتقان سٶزٸندە.
ٶز كەزەگٸندە مينيستر ەنەرگييا قۋاتى نارىعىندا بٸرىڭعاي ساتىپ الۋشى انىقتالعانىن اتاپ ٶتتٸ. 2019 جىلدىڭ 1 قاڭتارىنان نارىقتى ٸسكە قوسۋ ٷشٸن 2017 جىلى قاجەتتٸ جۇمىستار دايارلاندى.
«بٸرىڭعاي ساتىپ الۋشى رەتٸندە «كەگوك» اق-نىڭ ەسەپتەۋ-قارجىلىق ورتالىعى ايقىندالدى. بيىل بارشا ەلٸمٸز بويىنشا ەكٸ جاتتىعۋ شارالارىن ٶتكٸزبەكپٸز, ياعني ناقتى ۋاقىت رەجٸمٸندە قۋات نارىعىنىڭ جۇمىسىن باعالايمىز», - دەپ تٷسٸندٸردٸ بوزىمباەۆ.
سونىمەن قاتار ۆەدومستۆو باسشىسى ەنەرگييا تاراتاتىن ۇيىمداردى ٸرٸلەندٸرۋ تەتٸگٸ دە انىقتالعانىن جەتكٸزدٸ.
«2018 جىلى ەنەرگييا بەرەتٸن ۇيىمداردا ديسپەتچەرلٸك باسقارۋ بەكەتٸ بولۋى تيٸس. وسى ورايدا بٸز ونىڭ بارلىعىن تەكسەرٸپ شىعامىز. ال وسىنداي بەكەتتەرٸ جوق كومپانييالاردى جابامىز. (...) بٸلٸكتٸلٸك تالاپتارىن ورىندامايتىن ۇيىمدارعا شارالار قابىلدانادى. سونىمەن قاتار تاريفتٸ ازايتۋعا قاراي قايتا قاراستىرۋ شارالارى ەسكەرٸلگەن. وسى ارقىلى, ولار ٶزگە ٶڭٸرلٸك ەلەكتر جەلٸلٸك كومپانييالارمەن ٸرٸلەنۋٸ ٷشٸن ىنتالاندىرۋ بولادى», - دەپ تٷسٸندٸردٸ مينيستر.
ونىڭ سٶزٸنە قاراعاندا, نەتيجەسٸندە, ەنەرگييا تاراتاتىن ۇيىمدار 30 پايىزعا قىسقارادى, ياعني 160-تان 110-عا دەيٸن. بۇل ٶز كەزەگٸندە اتالعان ۇيىمداردىڭ شىعىندارىن وڭتايلاندىرۋعا مٷمكٸندٸك بەرەدٸ. بٸرٸنشٸ كەزەكتە, تٷرلٸ باسشىلار, كونتروللەرلەر ازايادى.
«بٸراق تا بۇل جۇمىستار تيٸستٸ ۋاقىتتى قاجەت ەتەدٸ. 2017 جىلى ٷش ەنەرگييا تاراتاتىن كەسٸپورىن جۇمىسىن توقتاتتى, 2018 جىلى 27 كومپانييا ٶزٸنٸڭ قىزمەتٸن دوعارادى», - دەپ ناقتىلادى مينيستر.
قانات بوزىمباەۆتىڭ بايانداماسىنان كەيٸن پرەزيدەنت نۇرسۇلتان نازارباەۆ تيٸستٸ تاپسىرمانى جٷكتەدٸ.
«سالاداعى جاعدايدى ەگجەي-تەگجەيلٸ بايانداپ بەردٸڭ, الايدا اتالعان جۇمىستىڭ نەتيجەسٸندە ٶڭٸرلەر اراسىندا تاريفتەر ايىرماشىلىعى ىڭعايلانۋى كەرەك. سونىمەن قاتار تۇتىنۋشىلار ٷشٸن ەلەكتر ەنەرگيياسىنىڭ قۇنى تٶمەندەۋٸ قاجەت», - دەپ تٷيدٸ مەملەكەت باسشىسى.
