Prezident Nursultan Nazarbaev Energetika ministrligine tutynýshylar úshin elektr energiiasynyń qunyn arzandatýdy tapsyrdy, dep habarlaidy QazAqparat.
«Biryńǵai satyp alýshynyń modelin engizý men óńirlik elektr jelilik kompaniialardy irilendirý josparlanýda. Energetika ministri bul sharalar jaqsy nátije beretinin, tutynýshy úshin elektr energiiasy qunyn tómendetetinin baiandaǵan bolatyn. Alaida buǵan qol jetken joq», - dedi Prezident QR Energetika ministri Qanat Bozymbaevqa qaratyp aitqan sózinde.
Óz kezeginde ministr energiia qýaty naryǵynda biryńǵai satyp alýshy anyqtalǵanyn atap ótti. 2019 jyldyń 1 qańtarynan naryqty iske qosý úshin 2017 jyly qajetti jumystar daiarlandy.
«Biryńǵai satyp alýshy retinde «KEGOK» AQ-nyń esepteý-qarjylyq ortalyǵy aiqyndaldy. Biyl barsha elimiz boiynsha eki jattyǵý sharalaryn ótkizbekpiz, iaǵni naqty ýaqyt rejiminde qýat naryǵynyń jumysyn baǵalaimyz», - dep túsindirdi Bozymbaev.
Sonymen qatar vedomstvo basshysy energiia taratatyn uiymdardy irilendirý tetigi de anyqtalǵanyn jetkizdi.
«2018 jyly energiia beretin uiymdarda dispetcherlik basqarý beketi bolýy tiis. Osy oraida biz onyń barlyǵyn tekserip shyǵamyz. Al osyndai beketteri joq kompaniialardy jabamyz. (...) Biliktilik talaptaryn oryndamaityn uiymdarǵa sharalar qabyldanady. Sonymen qatar tarifti azaitýǵa qarai qaita qarastyrý sharalary eskerilgen. Osy arqyly, olar ózge óńirlik elektr jelilik kompaniialarmen irilenýi úshin yntalandyrý bolady», - dep túsindirdi ministr.
Onyń sózine qaraǵanda, nátijesinde, energiia taratatyn uiymdar 30 paiyzǵa qysqarady, iaǵni 160-tan 110-ǵa deiin. Bul óz kezeginde atalǵan uiymdardyń shyǵyndaryn ońtailandyrýǵa múmkindik beredi. Birinshi kezekte, túrli basshylar, kontrollerler azaiady.
«Biraq ta bul jumystar tiisti ýaqytty qajet etedi. 2017 jyly úsh energiia taratatyn kásiporyn jumysyn toqtatty, 2018 jyly 27 kompaniia óziniń qyzmetin doǵarady», - dep naqtylady ministr.
Qanat Bozymbaevtyń baiandamasynan keiin Prezident Nursultan Nazarbaev tiisti tapsyrmany júktedi.
«Saladaǵy jaǵdaidy egjei-tegjeili baiandap berdiń, alaida atalǵan jumystyń nátijesinde óńirler arasynda tarifter aiyrmashylyǵy yńǵailanýy kerek. Sonymen qatar tutynýshylar úshin elektr energiiasynyń quny tómendeýi qajet», - dep túidi Memleket basshysy.
