دارىنسىز ەلەكتريك
قازاق ۋنيۆەرسيتەتٸنٸڭ جۋرناليستيكا فاكۋلتەتٸنە ٶندٸرٸستە بٸرنەشە جىل جۇمىس ٸستەپ كەلمەسەڭ تٷسە المايتىن كەزدەر بولدى. بولاشاق جۋرناليستەردٸڭ سول ەكٸ ورتادا اينالىسپايتىن كەسٸبٸ جوق. بٸرەۋٸ — شوپىر, ەكٸنشٸسٸ — توكار, ٷشٸنشٸسٸ — كٷزەتشٸ, تٶرتٸنشٸسٸ قۇرىلىسشى… وقۋعا تٷسكەنشە كٸمنٸڭ قانداي جۇمىس ٸستەگەنٸ ەڭبەك كٸتاپشاسىندا جازۋلى تۇرادى. ال مەكتەپتەن كەيٸن بٸردەن وقۋعا ٸلٸنگەن سارى اۋىز بالاپانداردىڭ بار ۋاقىتى ەسكەردەن كەلگەندەردٸڭ «مايدان حيكايالارى» مەن ٶندٸرٸستەن كەلگەندەردٸڭ «ەڭبەكتەگٸ ەرلٸكتەرٸنٸڭ» جاي-جاپسارىن تىڭداۋمەن كەتەدٸ. ولاردىڭ اراسىندا قايدا ٸستەگەنٸن تەپتٸشتەپ, كٶرٸنگەن جەردە ەڭگٸمەلەۋگە قۇمارتپايتىن دا توپ بار. قاراپايىمدىلىعىنان شىعار دەيمٸز دە قويامىز. دايىندىق كۋرسى ارقىلى تٷسٸپ قويعان, الا جازداي ەمتيحان تاپسىرىپ, ارامتەر بولىپ جٷرگەن بٸزگە شەكەسٸنەن قاراعان جەتٸ-سەگٸز نوياننىڭ بٸرٸ تالعات باتىرحان دا سولاردىڭ قاتارىنان ەدٸ. جاقىنىراق تانىستىق. وقۋعا تٷسكەنگە دەيٸن ەكٸ جىل ەلەكتريك بولىپ جۇمىس ٸستەپتٸ. «و-و-و!», — دەدٸك بٸز. كەرەمەت ماماندىقتىڭ يەسٸ قاسىمىزدا جٷر. تٸپتٸ رازريادى دا بار ەكەن. ەلەكتر شامىن اجىراتىپ-قوسۋدى عانا بٸلەتٸن بٸز تالعاتقا قاتتى قىزىعامىز. بٸر عاجابى, بٸلٸكتٸ مامان ەلەكتر تاقىرىبىنا باسپايدى. جٸگەرلەندٸرەمٸز, ەلەكتر تۋرالى ەڭگٸمە ايتىپ, جٷرەگٸن جٸبٸتكٸمٸز كەلەدٸ. قاباعىن قاقپايدى. كٶپەن ەمٸربەكتٸڭ «… دەپ ماي شامدى بٸرەۋلەر جەبەپ بٸردە, باستىق ەتٸپ جٸبەردٸ ەلەكترگە!», — دەگەن ٶلەڭ جولدارىن وقيمىز. بالا سەلت ەتپەيدٸ. «لەنيننٸڭ ٶزٸ «كوممۋنيزم دەگەنٸمٸز — بٷكٸل ەلدٸ ەلەكترلەندٸرۋ!» دەگەن» دەپ, ساياسي سەزٸمٸن وياتۋعا تىرىسامىز. لەنيندٸ ايتقاندا ماڭدايى سەل جٸپسٸگەندەي بولادى, بٸراق مەسەلەنٸڭ ەلەكترمەن بايلانىستى ەكەنٸ ەسٸنە تٷسٸپ, قايتادان قاسارىسىپ قالادى. بٸردە جاتاقحانادا ەلەكتر شامى اياق استىنان سٶنٸپ قالدى. سول كەزدە بٸزدٸڭ ەلەكتريكتٸڭ كەسٸبي بەلسەندٸلٸگٸ ونشا بايقالا قويمادى. قىزدار بايعۇس «بٸردەڭە قىلساڭشى» دەگەندەي, ورتامىزداعى جالعىز مامانعا جاۋتاڭ-جاۋتاڭ قارايدى. مامان بولسا, تٷنەرٸپ ٷندەمەيدٸ. سودان بەرٸ ەلەكتر تاقىرىبىن قوزعاعانىمىز جوق. مٸنە, شيرەك عاسىردان استى, بۇل مەسەلەنٸ ەلٸ دە جابىق تاقىرىپ ەتٸپ ۇستاپ كەلەمٸز.
بەرٸبٸر ول ەلەكتريك كەسٸبٸن بوسقا تاڭداماپتى. جانىنداعىلارعا جاعىمدى ەنەرگييا تاراتاتىن قاسيەتٸ بار سيياقتى. تالعاتتىڭ تٶڭٸرەگٸنە جولاپ كەتكەن ادام شىرق ٷيٸرٸلٸپ شىقپاي قويادى. ەلەكتردەن باسقا تاقىرىپ قوزعالسا بولدى, جورعاداي جوسىلادى. سٶيلەگەندە اۋىزدىعا دەس بەرمەيدٸ. بٸر باستاسا بٸرازعا دەيٸن كٶسٸلەدٸ. تٷن ورتاسى اۋعانشا جاتاقحانانىڭ دەلٸزٸندە سايراپ وتىرادى. كۋرسىمىزدىڭ اقىندارى:
ەڭگٸمە ايتسا, ەكٸ قولىن سەرمەگەن,
ۇشىپ-قونعان مۇنداي ادام كٶرمەپ ەم.
كەرەك بولسا, زالدان ٸزدە, سەن ونى,
تالدىبايدى تابا المايسىڭ بٶلمەدەن, —
دەپ, سەبيت دٶنەنتاەۆشا سٸلتەپ, وعان ٶلەڭ ارنايتىن.
«چەرەنكوۆ تٷگٸلٸ چەرنەنكو شىقسا دا…»
ايران ۇرتتاپ, قوي قۇرتتاعان اۋىلدىڭ بالاسى ەدٸ. اۋقاتتى وتباسىندا ٶستٸ. شەشەسٸ — جەتٸسۋ ٶڭٸرٸنە بەلگٸلٸ اتاقتى شوپان نۇرلىحان ىسقاقوۆا. جوعارعى كەڭەستٸڭ دەپۋتاتى بولعان, لەنين وردەنٸن يەلەنگەن كٸسٸ. سول كٸسٸ باعىپ-قاققان بالانىڭ سٶز ٶنەرٸنە بەيٸمٸ بار ەكەنٸ كٸشكەنە كٷنٸنەن بايقالدى. بٸردە تراكتورعا مٸنەم دەپ, تەرەزەسٸنەن قۇلاپ, بەتٸن ەينەك جىرىپ كەتٸپتٸ. سوندا «نەگە مٸنەسٸڭ, ٶلەيٸن دەپ جٷرسٸڭ بە?!» دەگەن ٷلكەندەرگە قارشاداي عانا ٷرپەكباس بالا: «ٶلەيٸن دەپ ەمەس, كٶرەيٸن دەپ جٷرمٸن عوي!», — دەپتٸ. يەگٸندە سودان قالعان تىرتىق ەلٸ بار. جەتپٸس ەكٸنشٸ جىلى الىستاعى اۋىلعا كەلگەن العاشقى تەلەۆيزورلاردىڭ بٸرٸ وسى ٷيگە بۇيىرادى. ارمانشىل بالا كٸتاپتان قولى سەل بوساسا بولدى, سول جيىرما قويدىڭ جٷنٸن ٶتكٸزٸپ العان «يزۋمرۋدتىڭ» ماڭىنان تابىلادى. كٶشەگە كٶپ شىقپايدى. تازا ٷيكٷشٸك. الىسىپ-جۇلىسپايدى. بالا بولىپ تٶبەلەسٸپ تە قارق قىلمايدى. وعان ىقىلاسى دا, بەيٸمٸ دە جوق. سول تەلەۆيزور ٷيگە كەلگەننەن كەيٸن ميۋنحەن وليمپياداسى باستالدى. ونىڭ الدىندا «قايراتتىڭ» ويىندارىن كٶرٸپ جٷرەتٸن. ورداباەۆ پەن بايشاقوۆتاردىڭ ەل اۋزىنداعى اڭىزعا اينالىپ تۇرعان كەزٸ. بٸراق وليمپيادانىڭ جٶنٸ بٶلەك ەكەن. باسكەتبولدان وداق قۇراما كومانداسىنىڭ مٷشەسٸ ەلجان جارمۇحامەدوۆتىڭ ويىنىن تاماشالادى. قاسىنداعىلاردىڭ تاتار ما, ەلدە قازاق پا دەپ تاڭدانىسقانى ەسٸندە. بويى — ەكٸ مەتر جەتٸ سانتيمەتر. سودان باستاپ سپورتقا دەگەن قۇمارلىعى وياندى. «قىزىلتاڭ» اۋىلى سپورتشى اۋىل ەدٸ. ٷيٸنٸڭ تۋرا جانىنداعى بالاباقشانىڭ سپورت الاڭى بار. سوندا ەرتەدەن كەشكە دەيٸن اق تەر, كٶك تەر بولىپ دوپ قۋالاپ تا كٶردٸ. فۋتبولشى بولۋعا اڭسارى اۋدى. سەگٸزٸنشٸ-توعىزىنشى كلاسقا بارعاندا تەۋٸر سپورتشى بولمايتىنىن ۇقتى. سەبەبٸ فۋتبولدى ەلدەقايدا كەيٸن باستاعان بالالار كٶپ ۇزاماي مەكتەپ قۇراماسىندا ويناي باستادى. سودان سوڭ الاٶكپە بولىپ جٷگٸرۋدٸ قويدى. اۋىلدا ەكٸ-ٷش ادام عانا «سوۆەتسكيي سپورت» گازەتٸن, «فيزكۋلتۋرا ي سپورت» «سپورتيۆنىە يگرى» جۋرنالدارىن جازدىرىپ الاتىن. بۇل سونىڭ بٸرەۋٸ ەدٸ. ەندٸ سپورت جۋرناليسٸ بولۋعا بەل بۋدى. ەيتەۋٸر سپورتتىڭ ماڭايىندا جٷرگٸسٸ كەلدٸ. نيكولاي وزەروۆ, كوتە ماحارادزە, ۆلاديمير ماسلاچەنكولاردىڭ رەپورتاجدارىن ٷزبەي كٶرٸپ وتىردى. كەز-كەلگەن فۋتبول كومانداسىنىڭ ويىنشىلارىنىڭ اتى-جٶنٸن جاتقا سوعاتىن. فۋتبولشىنىڭ نەمەسە باسكەتبولشىنىڭ بويىنىڭ ٶلشەمٸ قانشا, كٸم قانشا دوپ سوقتى, سونىڭ بەرٸنٸڭ دەرەكتەرٸ ميىندا ساپىرىلىسىپ جٷرەتٸن. وسىعان تاڭقالاتىنىمىز سونشالىق, وقۋعا تٷسكەن جىلى ونىڭ سپورت جۋرناليسٸ بولاتىنىنا ەشكٸمنٸڭ دە كٷمەنٸ جوق ەدٸ. وقىعان-توقىعانى كٶپ. ەدەمٸ سٶيلەيدٸ, سٶزدٸڭ مەيەگٸن بٸلەدٸ. جۋرفاكتاعى جازۋعا ارنالعان تاپسىرمالاردى شەبەرلٸكپەن ورىندايدى. «وبششىم, وقۋعا بالا ەمەس, سپورت ەنتسيكلوپەديياسى تٷسٸپتٸ عوي» دەدٸ باعاسىن بٸلەتٸندەر. بٸراق سول اۋزىندا دامىل جوق, قولىندا قيمىل جوق «ەنتسيكلوپەدييانى» ەپتەگەن جالقاۋلىق قۇرتتى. باسقالارداي تىنىمسىز بولعان جوق. رەداكتسييالارعا شابا بەرمەيدٸ. الاش جۇرتىن بيلەگەن اتالارىنىڭ دەستٷرٸمەن اسپاي-ساسپاي تٸرشٸلٸك ەتتٸ. باپپەن جٷرٸپ-تۇردى. تەتتٸ ارمان مەن تەتتٸ ۇيقىنى قاتار الىپ جٷردٸ.
بٸردە جاتاقحاناداعى كٷللٸ ستۋدەنت دەلٸزدەگٸ جالعىز تەلەۆيزوردان اتاقتى «سپارتاكتىڭ» ەلدەبٸر شەتەلدٸك كوماندامەن جان الىسىپ, جان بەرٸسكەن ويىنىن كٶرٸپ وتىردىق. جانكٷيەرلەردٸڭ اۋزىنان اق كٶبٸك اعادى. فۋتبول دەسە ٸشكەن اسىن جەرگە قوياتىن تالعات سولاردىڭ بەل ورتاسىندا. ويىننىڭ اياقتالۋىنا نەبەرٸ ٷش مينۋت قالدى. ٷمٸت كٷتكەن «سپارتاك» جەڭٸلگەلٸ تۇر. «شٸركٸن-اي, چەرەنكوۆ شىقسا ەكەن!», — دەدٸ جٸگٸتتەردٸڭ بٸرٸ. «سپارتاكتىڭ» اقبەرەنٸ سول كٷنٸ زاپاستاعى ويىنشىلاردىڭ قاتارىندا ەدٸ. سول كەزدە تالعات: «ەندٸ چەرەنكوۆ تٷگٸلٸ چەرنەنكو شىقسا دا گول بولمايدى!», — دەدٸ عوي… جۇرت فۋتبولدى جايىنا قالدىرىپ, كٷلكٸگە كٶمٸلدٸ. بۇل ەبدەن شارشاعان كەزدە تٸزگٸن ۇستاعان, قالت-قۇلت ەتكەن كەرٸ گەنسەك كونستانتين چەرنەنكونىڭ بيلٸك قۇرعان تۇسى ەدٸ.
ستۋدەنتتٸك جىلدارىندا «قايراتتىڭ» بٸردە-بٸر ويىنىن جٸبەرمەي, ستاديوننان بارىپ كٶردٸ. بٸز, تالعات, قايرات ەلٸمبەكوۆ ٷشەۋمٸز جاتاقحانانىڭ بٸر بٶلمەسٸندە تۇراتىن ەدٸك. قايرات ەكەۋمٸزدٸڭ فۋتبولعا اسا قۇلقىمىز جوق. بٸر كٷنٸ تاڭەرتەڭ ۇيقىدان تۇرىپ جاتتىق. ەرتەرەك ويانعان قايرات اقىن بالكونعا شىعىپ, تەمەكٸسٸن ەزۋٸنە قىستىرىپ, «قار جاۋىپ تۇر…» دەپ قۋانىپ, ٶلەڭ ٶرٸپ جٷر. سونى ەستٸگەن تالعات جاۋ تيگەندەي اتىپ تۇردى. «نە دەيسٸڭ?! قار جاۋدى دەگەنشە قان جاۋدى دەسەڭشٸ. بٷگٸنگٸ «قايراتتىڭ» ويىنى ويىن بولمايدى عوي ەندٸ…». تالعات كٶزٸ اقشالاڭداپ, كٷيٸنٸپ جٷرسە, قايرات: «ماع-عان بەر-رٸ-بٸر!», — دەپ شيقىلداپ كٷلەدٸ…
سەتسٸز سۇحباتتار
تالعات جۋرناليستيكا فاكۋلتەتٸنە بارعانعا دەيٸن بالا بولىپ بٸر ماقالا جازىپ كٶرگەن ەمەس. ونىڭ ەسەسٸنە كٷنٸ-تٷنٸ كٸتاپ كەمٸردٸ. رۋحاني تۇرعىدان دايىن ەدٸ. جۋرفاكقا قۇجات تاپسىرۋ ٷشٸن جارييالانعان دٷنيەلەردٸڭ بولۋى كەرەكتٸگٸنەن دە حابارسىز ەكەن. سونى ەستٸگەن بويدا وردەندٸ كەمپٸر بٸردەن اۋدانعا تارتادى. گازەت رەداكتسيياسىنا كەلەدٸ. كٷندە گازەتتٸڭ بەتٸن بەرمەيتٸن ول كٸسٸنٸ بەرٸ تانيدى. ٸلگەرٸدە «جەتٸسۋ» گازەتٸ باس رەداكتورىنىڭ ورىنباسارى كەكٸمجان قازىباەۆتىڭ ٶزٸ قويانكٶز جايلاۋىندا جامباستاپ جاتىپ, نۇرلىحان اپامەن ەڭگٸمەلەسٸپ, كەيٸننەن ٷلكەن وچەرك جازعان-دى. «ويباي, اپا, نە عىپ جٷرسٸز?». «بالام بيىل وقۋعا بارادى. تالابى بار, ماقالاسى جوق!». «بولدى اپا, تاس قىلامىز!». رەداكتور بۇل شارۋانى ٶزٸنٸڭ ورىنباسارى حاسەن كٶپتٸلەۋوۆكە تاپسىرادى. حاسەكەڭ بٸزدٸڭ كەيٸپكەرٸمٸزدٸڭ اتىنان بەس-التى ماقالانى ەكٸ-ٷش كٷندە جەدەل جارييالاپ جٸبەرەدٸ. ەجەسٸ دە ولاردى رەنجٸتپەي, بٸر قويىن سويىپ, اراق-شارابىن اپارىپ, جورالعىسىن جاساپ قايتادى. بٸراق بالا ول جىلى وقۋعا تٷسە المايدى. اۋىلعا كەلگەن سوڭ كلۋبتا بولعان بٸر كونتسەرت تۋرالى شاعىن حابار جازدى. ونىسى اۋداندىق گازەتتە جارىق كٶرەدٸ. جۋرناليستيكاداعى العاشقى ٶز دٷنيەسٸ وسى ەدٸ.
جۋرفاكقا تٷسكەن سوڭ دا ماقالا جازىپ قارق قىلعان جوق. جانىعىپ جٷرەتٸن كۋستاستارىنا ەرٸپ, «جاس الاشقا» بارىپ كٶردٸ. بٸراق بٸر-ەكٸ نەرسەدەن مەسەلٸ قايتىپ, رەداكتسيياعا كٶپ جولاماي قويدى. كينو تاقىرىبىن ٶتە جاقسى بٸلەتٸن. سەكسەنٸنشٸ جىلداردا الماتىدا ٸرٸ حالىقارالىق كينوفەستيۆال ٶتتٸ. كۋرستاسى امانعالي دايراباەۆ ەكەۋٸ «تاسس مەلٸمدەۋگە ٶكٸلەتتٸ» فيلمٸنٸڭ رەجيسسەرٸ فوكينگە جولىعىپ, سۇحبات الدى. بٸرٸ «سوتسياليستٸك قازاقستانعا», ەكٸنشٸسٸ «لەنينشٸل جاسقا» بەرمەك. بۇل تٷنٸمەن وتىرىپ «رەجيسسەر — ەڭ قيىن ماماندىق» دەگەن سۇحبات جازىپ, رەداكتسيياعا الىپ باردى. ەدەبيەت بٶلٸمٸنٸڭ قىزمەتكەرٸ جٷسٸپبەك قورعاسبەكوۆ سۇحباتتىڭ جەتپەگەن جەرٸن جەتكٸزٸپ, دايىنداپ ۇسىنادى. سونىڭ اراسىندا اعا گازەتكە دايىندالعان سۇحبات جارييالانىپ كەتەدٸ. بٶلٸم مەڭگەرۋشٸسٸ قامبار كەرەيقۇلوۆ: «مىناۋ كەشە شىققان دٷنيە عوي» عوي دەپ ىسىرا سالادى. تٸپتٸ وقىمايدى دا.
ەكٸنشٸ رەت سول گازەتكە تاعى بٸر سۇحباتى ٶتپەي قالدى. جىلدا وداقتىڭ 33 ٷزدٸك فۋتبولشىسى انىقتالاتىن. «قايراتتىڭ» تاريحىندا بۇل تٸزٸمگە العاش رەت ۆاديم ستەپانوۆ دەگەن قورعاۋشى كٸرگەن. سودان كەيٸن ەنٸپ تۇرعان ەۆستافيي پەحلەۆانيديدٸ «مەدەۋگە» ارنايى ٸزدەپ بارىپ, سۇحبات العان-دى. دٷرەلٸ دٷيسەباەۆ دايىنداپ ۇسىنعان دٷنيەگە ٶزٸنٸڭ ەڭ جاقسى كٶرەتٸن سەيداحمەت بەردٸقۇلوۆ اعاسى «مۇنداي جاتتاندى ينتەرۆيۋدٸ جارييالاۋدىڭ جٶنٸ جوق» دەپ سول قولىمەن بۇرىشتاما جازىپ قويىپتى. ەرينە, سۇحباتتا جاتتاندىلىق بارى راس ەدٸ…
ستۋدەنت كەزٸن تٷگەلدەي كٸتاپ وقۋعا ارنادى. كەڭەستٸك كينوجۇلدىزدار الماتىعا كەلە قالسا, سولاردى ٸزدەپ كەتەدٸ. بٸردە تانىمال ەرتٸس ۆاحتانگ كيكابيدزە ەكەۋٸ قولتىقتاسىپ, رەسپۋبليكا سارايىنىڭ الدىندا جارتى ساعات جٷرگەنٸ بار. ۇلى گرۋزين العاشقىدا مۇنى بالا دەپ مەنسٸنبەگەنگە ۇقسايدى. بۇل قاپتالداسىپ قويمايدى. بٸراق ٶر مٸنەز ۆاحتانگتىڭ كٶپ بٸلەتٸن كٶكەزۋ ستۋدەنتپەن سٶيلەسپەسكە امالى قالمايدى. گرۋزين فيلمدەرٸنٸڭ جاي-جاپسارىن شەمٸشكٸدەي شاعىپ تۇر. گرۋزينٸڭ نە, كەڭەستٸك كينونىڭ جايىن دا كينوسىنشىدان ارتىق بٸلمەسە, كەم بٸلمەيدٸ. تٸپتٸ ٶزٸن ەلدٸڭ بەرٸنە مەلٸم ەمەس نىسپىسىمەن اتاپ, «بۋبا!» دەپ قويادى. «ەي, سەن نە قىلعان بالاسىڭ?, — دەيدٸ كيكابيدزە, — جٷرشٸ بىلاي, ەڭگٸمەلەسەيٸك!». سودان تٷننٸڭ بٸر ۋاعىنا دەيٸن سۇحبات جازدى. ونىسىن ساباققا بارماي, قۇلقىنسەرٸدەن تۇرىپ, «لەنينشٸل جاسقا» الىپ كەتٸپ ەدٸ, اعالارى: «باسپاسٶز كونفەرەنتسيياسىندا ايتىلعان فاكتٸلەر عوي», — دەپ باسپاي قويىپتى. «باسپاسٶز كونفەرەنتسيياسىنا جولاعانىم جوق, ٶزٸمەن جارتى ساعات ەڭگٸمەلەسٸپ كەلدٸم», — دەسە سەنبەگەن. سٶيتٸپ, قاپالانىپ وتىر ەكەن. بايعۇستى اياپ كەتتٸم. قولىمدا قارابايىر اقپارات قۇرالى بار ەدٸ — جاتاقحانا قابىرعا گازەتٸنٸڭ رەداكتورى ەدٸم. بٸر سٶزٸن ٶزگەرتپەي جارييالاپ جٸبەردٸم. مەز بولىپ قالدى. كەيٸن بەرٸبٸر سول كيكابيدزەگە استانادا جولىعىپ, ەلگٸ سۇحباتىن كەڭەيتٸپ جارييالادى.
ٶزٸ باياۋ قيىلدايتىن ادامنىڭ وسىنداي ٷش سۇحباتىنىڭ سەتسٸز بولۋى جازۋعا دەگەن بەلسەندٸلٸگٸن ازايتىپ جٸبەردٸ. سودان سوڭ جازۋمەن ەمەس, وقۋمەن اينالىستى. كەيدە وسى سەتسٸزدٸكتەرٸنٸڭ ٶزٸ كەيٸنگٸ سەتتٸلٸكتەرٸنە جول اشقان سەكٸلدٸ كٶرٸنەدٸ.
«ەر قىزمەتكە ەكٸ رەت كەلەم…»
بٸر ادامداي جالقاۋلىعى بار. بٸراق ەلدٸڭ جازعانىن وقۋدان جالىققان جوق. قولىنا جاڭا كٸتاپ تٷسسە, جالقاۋلىعى جايىنا قالادى. باس الماي بٸتٸرٸپ تاستايدى. بٸلٸم-بٸلٸگٸ جاعىنان قاتارلاستارىنىڭ بٸرازىن جولدا قالدىرادى. جان بالاسىنا ۇقسامايتىن بٸر قاسيەتٸ بار. اۆتوقالامعا جولامايدى. ٶمٸرٸ سييامەن جازادى. جٷرگەن جەرٸندە قالامۇش ٸزدەيدٸ. قازٸرگٸ جۋرناليستەر نە ەكەنٸن بٸلمەيتٸن, وسىدان وتىز جىل بۇرىنعى دەۋٸردە جازۋ ەلەمٸنٸڭ قاراجورعاسى سانالعان ەيگٸلٸ 11-شٸ قالامۇشتىڭ جٷز داناسىن ەلدەقانداي سەبەپپەن ساقتاپ قالعان قويمادان تاۋىپ العان. سونى سيياساۋىتقا مالىپ الىپ, مارجانداي جازۋىن تٷزەدٸ. ەنشەيٸندە كٷنٸگە مىڭ رەت سٷرٸنٸپ-قابىنىپ جٷرەتٸن ەبەدەيسٸز ادامنىڭ سييانىڭ بٸر تامشىسىن دا تٶكپەيتٸنٸنە تاڭ قالاسىڭ. «11-شٸ قالامۇشپەن تەك مۇحتار ماعاۋين اعامىز ەكەۋمٸز عانا جازامىز», — دەپ كٷلەدٸ. سييامەن جازاتىن قالامساپتاردان كوللەكتسييا جينايدى. تالعاتتا قالامساپتىڭ دا, قالامۇشتىڭ دا جەتٸ اتاسى بار. كٶنەنٸڭ سٶزٸن سٶيلەيتٸن ٶزٸ سەكٸلدٸ 11-شٸ قالامۇشتى ٷنەمٸ سٷرتكٸشتەپ, باپتاپ وتىرعانىن كٶرەسٸڭ. كومپيۋتەرٸڭە دە, ينتەرنەتٸڭە دە پىسقىرمايدى. ميىنداعى مەلٸمەتٸن وسىلاردىڭ قاي-قايسىسىنا دا ايىرباستامايدى.
وقۋ بٸتٸرە سالا ٶزٸ تۋىپ-ٶسكەن تالدىقورعانعا تارتىپ وتىردى. سوندا پراكتيكادا جٷرگەندە ەنشٸ تاتيانا پولتاۆسكايامەن سۇحباتى جارييالانىپ ەدٸ. سونىڭ ەسەرٸ بولار, مۇنى وبلىستىق گازەت رەداكتسيياسى تٸلشٸلٸك قىزمەتكە الدى. بەس جىلدان سوڭ «حالىق كەڭەسٸ» گازەتٸنٸڭ تالدىقورعان وبلىسىنداعى مەنشٸكتٸ تٸلشٸسٸ بولىپ تاعايىندالدى. گازەت رەداكتسيياسى باس رەداكتوردىڭ ورىنباسارى قىزمەتٸنە قايتا شاقىردى. ەكٸ جىلدان سوڭ «حالىق كەڭەسٸنٸڭ» سول ٶڭٸردەگٸ تٸلشٸسٸ قىزمەتٸنە تاعى كەلدٸ. «حالىق كەڭەسٸ» جابىلىپ قالعان سوڭ وبلىستىق گازەتكە ورالىپ, تٸلشٸ بولدى. تاعى دا ورىنباسارلىققا كٶتەرٸلدٸ. جالپى, تالعاتتىڭ جۋرناليستٸك قىزمەتٸندە قىزىق بٸر ٷردٸس بار. بەرٸنە دە ەكٸنشٸ رەت قايتىپ كەلۋ پەشەنەسٸنە بۇيىرعان ەكەن. ەكٸ رەت تٸلشٸ, ەكٸ رەت مەنشٸكتٸ تٸلشٸ, ەكٸ رەت ورىنباسار…
كەيدە بەلگٸلٸ بٸر وقيعالاردىڭ بٷكٸل ٶمٸر جولىڭدى ٶزگەرتٸپ جٸبەرەتٸن كەزٸ بولادى. بٸر كٷنٸ اياق استىنان تالدىقورعان وبلىسى جابىلىپ قالماعاندا تالعات ەلٸ كٷنگە دەيٸن سول ٶڭٸردە جٷرە بەرۋٸ دە مٷمكٸن ەدٸ. وبلىس جابىلعان سوڭ وبلىستىق گازەت تە قوسا جابىلدى. كٷنٸ كەشە عانا ايدارىنان جەل ەسٸپ تۇرعان باس رەداكتوردىڭ ورىنباسارى اياق استىنان جۇمىسسىز قالدى. بارماعان جەرٸ جوق. قالالىق گازەتكە دە, قالالىق راديوعا دا باس سۇقتى. ورىن جوق. قاتتى قينالدى. بۇرالىپ سەگٸز اي جاتتى. شٷكٸر, دوس-جولداستان كەندە ەمەس ەدٸ. سول جولداستارىنىڭ بٸرٸ, نايزاعايعا نان پٸسٸرٸپ الاتىن جۇلىمىر جۋرناليست مۇراتبەك توقتاعازين تالدىقورعاندا جاتقان جەرٸنەن جۇلىپ الىپ, استانادان بٸر-اق شىعاردى. جاڭا استانامەن بٸرگە جاڭارىپ جاتقان «استانا اقشامى» گازەتٸ باس رەداكتورىنىڭ ورىنباسارى بولىپ بەكٸتٸلدٸ.
— گازەتتٸڭ سول كەزدەگٸ باس رەداكتورى جۇماگٷل ساۋحاتقا مىڭ دا بٸر راحمەت!, — دەيدٸ تالعات, — دوسىمنىڭ بٸر اۋىز سٶزٸنە بولا سىرىمدى بٸلمەسە دە سىناق مەرزٸمٸنسٸز قابىلدادى. بٸر-اق شارت قويدىم. «قارتاڭ ەجەم بار, سوعان جٸبەرٸپ تۇرساڭىز بولدى», — دەدٸم. جۇماگٷل ەپكەم سٶزٸندە تۇردى. جىلىنا تٶرت رەت جٸبەرٸپ تۇردى. كەيدە ەر ادامداردىڭ بويىندا كەزدەسە بەرمەيتٸن ٸرٸلٸگٸن بايقاتىپ تۇراتىن بۇل كٸسٸدەن كٶپ نەرسە ٷيرەندٸم.
وسى گازەت رەداكتورىنىڭ بٸرٸنشٸ ورىنباسارى قىزمەتٸنە كٸرٸسكەن جانبولات اۋپباەۆپەن بٸر بٶلمەدە سەگٸز اي بٸرگە وتىردى. جانبولات اعاسىن جانىنداي جاقسى كٶرەدٸ. كەدٸمگٸدەي ەلٸكتەيدٸ. ول كٸسٸنٸڭ تاعدىرى قىزىق ادامداردىڭ ٶمٸرٸن جازۋ تەجٸريبەسٸنە قانىقتى. سودان سوڭ بۇرىننان بەيٸمٸ بار وسىنداي تاقىرىپتارعا ٶزٸ دە دەندەپ كٸرٸسە باستادى. جاقاڭنىڭ ادامدارمەن قارىم-قاتىناسى, تٸلشٸلەرگە تاپسىرما بەرۋ تەسٸلٸ ەشكٸمگە ۇقسامايدى. «ەرتٷرلٸ جاعداي بولادى, ەشقاشان ەشكٸمنٸڭ ارىنا تيمە, ٶيتكەنٸ ادامنىڭ ەڭ قىمبات نەرسەسٸ سول», — دەپ ٷيرەتتٸ اعاسى. ونسىز دا قوي اۋزىنان شٶپ المايتىن بۇل وسى كەڭەستٸ ٷنەمٸ قاپەرٸندە ۇستايدى. جاقاڭنىڭ جۋرناليستٸگٸ ٶز الدىنا, گازەت ٸسٸنٸڭ جاي-جاپسارىن ٶتە جاقسى بٸلەدٸ. «باسىلىمنىڭ باۋ-شۋىن تارتۋدى ەرجۇمان مەن جانبولات اعالارىمنان ارتىق بٸلەتٸن ادام جوق», — دەيدٸ تالعات. كەيٸن جاقاڭنىڭ ورنىنا كەلگەن ديداحمەت ەشٸمحانوۆ گازەتكە ٶتكٸر مٸنەز ەكەلدٸ. «استانا اقشامىندا» قىزمەت ٸستەيتٸن جالاڭ اياق, جالاڭ تٶستەردٸڭ ەشقايسىنىڭ پەتەرٸ جوق ەدٸ. ون تٶرت وبلىستىڭ ٶكٸلٸ جۋرناليستٸك جۇمىستىڭ كٶرٸگٸن قىزدىرىپ جاتاتىن.
تالعات از جازسا دا ساز جازادى. ەرٸپتەستەرٸ: «بۇل الپىس جول ماقالا جازۋ ٷشٸن التى كٸتاپ وقيدى», — دەپ كٷلەدٸ. سيرەك كەزدەسەتٸن وقيعالارعا دەن قويدى. قىزىقتى تاعدىرلارعا ٷڭٸلدٸ. شەتەلدەردە مەرتەبەلٸ قىزمەتتٸڭ تۇتقاسىن ۇستاپ وتىرعان قازاقتار تۋرالى جازۋعا قۇمارتتى. قىسقاسى, جانبولات اعاسىنىڭ جولىن شىنداپ قۋدى. كسرو قورعانىس مينيسترٸ بولعان مارشال يازوۆتىڭ قازاق كومانديرٸ شايمۇقان مۇقانوۆ اقساقال تۋرالى جازدى. كەيٸن مەسكەۋگە جولى تٷسكەندە يازوۆتىڭ ٶزٸنە جولىقتى. مارشالعا ماقالانى كٶرسەتٸپتٸ. يازوۆ: «دوسىما سەلەم ايت, ول — كەرەمەت ادام!» دەپتٸ. جامبىلدىڭ جەكە دەرٸگەرٸ بولعان راحىمباي دوسىمبەكوۆ جٶنٸندە قالام تەربەدٸ.
وسىدان تٶرت جىل بۇرىن «ليتەر-Media» كومپانيياسىنا قاراستى «قازاقستان تەمٸرجولشىسى» گازەتٸنٸڭ باس رەداكتورى ەرٸ «ايقىن» گازەتٸ باس رەداكتورىنىڭ ورىنباسارى بولىپ تاعايىندالدى. استانا بيۋروسىنىڭ جەتەكشٸسٸ, سايىپقىران جۋرناليست سايىن ەسماعيمەن بٸرلەسٸپ, سالالىق باسىلىمعا بٸراز جاڭالىق ەكەلدٸ. مەكتەپ بٸتٸرگەنگە دەيٸن پويىزعا بۇت ارتىپ كٶرمەگەن بۇل ٶزٸ ٶمٸرٸ قىزىقپايتىن تەمٸرجول بويىنان دا تەۋٸر دەرەكتەر تاپتى. پاۆلودارعا بارىپ, سوندا تۇرعان ستاليننٸڭ ۆاگونى تۋرالى جازدى. كٶكشەتاۋدا ورنالاسقان مەدسەسترالاردىڭ ەلەمدەگٸ جالعىز مۋزەيٸ جٶنٸندە جۇرتشىلىققا مەلٸمەت ۇسىندى. تانىمال فيلمدەرگە تٷسكەن تەمٸرجولشىلاردى ەلگە تانىتتى. كۋيبىشەۆ مٸنگەن «كاديلاك» ماشيناسىن كٶكشەتاۋدان تاپتى. ەرينە, اياق استىنان امەريكا اشۋ قيىن. بٸراق وسىنداي توسىن تاقىرىپتاردى يگەرۋ ارقىلى ٶزٸنشە ٶزگەشە جول سالدى.
ەڭ جاقسى كٶرەتٸن جۋرناليستەرٸ — جانبولات اۋپباەۆ, جارىلقاپ بەيسەنبايۇلى, تٸلەكقابىل بورانعاليۇلى. وسى ٷش اعاسىنىڭ جازعان دٷنيەسٸ جارىق كٶرسە, وقىپ شىققانشا ەشتەڭەدە شارۋاسى بولمايدى. ٶز تٶڭٸرەگٸنە دە جاستار ٷيٸرٸلٸپ جٷرەدٸ. جاندوس بەدەلۇلى, ايحان شەرٸپ, تٶلەن تٸلەۋباەۆ, ەرەنعايىپ قۋاتايۇلى سىندى تالانتتى تايتۇياق نوياندار تالعات مىرزانىڭ شاراپاتىن مولىنان كٶردٸ.
يماندى جۋرناليستيكانى ۇناتادى. اتىس-شابىسقا, داۋ-دامايعا تولى تاقىرىپتارعا ٷيٸر كەيٸنگٸ بۋىنعا توسىرقاي قارايدى.
قيىرداعى قازاقتاردىڭ قامقورشىسى
جۋرناليستٸك ساپارمەن رەسەيگە بٸرنەشە رەت باردى. ەر ساپارىنان ولجالى قايتتى. قازاقتان شىققان تۇڭعىش وليمپيادا چەمپيونى ەلجان جارمۇحامەدوۆپەن بٸر اپتا بويى ەڭگٸمەلەسٸپ, وقىرماندى اتى اڭىزعا اينالعان باسكەتبولشىنىڭ ەل بٸلە بەرمەيتٸن دەرەكتەرٸنە قانىقتىردى. ن.بۋردەنكو اتىنداعى نەيروحيرۋرگييا ينستيتۋتىنىڭ لابوراتورييا مەڭگەرۋشٸسٸ, مەديتسينا عىلىمدارىنىڭ دوكتورى, ميعا وپەراتسييا جاساۋدىڭ تەڭدەسٸ جوق شەبەرٸ دۋلات مۇحامەدجانوۆتى ٶز حالقىنا تانىستىردى. سانكت-پەتەربۋرگ مەملەكەتتٸك پوليار اكادەميياسىنىڭ رەكتورى ازۋرگەت شەۋكەنباەۆا تۋرالى ماقالاسى كٷللٸ جۇرتتى ەلەڭ ەتكٸزدٸ. ازۋرگەت تاربايقىزى وسى وقۋ ورىنىڭ نەگٸزٸن قالاعان. فرانتسييانىڭ پرەزيدەنتٸ جاك شيراكپەن جۇمىس بارىسىندا ارالاسىپ-قۇرالاسىپ تۇرادى. سول ەلدٸڭ قۇرمەتتٸ لەگيون وردەنٸنٸڭ يەگەرٸ. چۋۆاشييانىڭ ەكونوميكا مينيسترٸ گٷلميرا تاعايقىزى اكيموۆانى (تۇرمىس قۇرعانعا دەيٸنگٸ فاميليياسى ەشٸمباەۆا) ٸزدەپ تاپقانىن ايتساڭشى. ونىڭ اتى-جٶنٸن جول ٷستٸندە كەزدەيسوق بٸرەۋدەن ەستيدٸ. سودان ال كەپ ٸزدە… چۋۆاشيياعا تەلەفون سوقسا, تالعاتتىڭ مينيستر قۇرداسى: «مەنٸ دە ٸزدەيتٸن ادام بار ەكەن-اۋ!», — دەپ كٶڭٸلٸ بوساپتى. گٷلميرانىڭ تالعاتقا «تاريحي وتانىممەن تابىستىرعانىڭىز ٷشٸن العىس ايتامىن!», — دەپ ارنايى جازعان حاتى بار. كەيٸن ٸنٸ تالعات پەن اعا تالعاتتىڭ (دٷنيەجٷزٸ قازاقتارى قاۋىمداستىعى تٶراعاسىنىڭ بٸرٸنشٸ ورىنباسارى ت.ماماشەۆ) ٶزارا مەمٸلەسٸنٸڭ ارقاسىندا ازۋرگەت شەۋكەنباەۆا مەن گٷلميرا تاعايقىزى دٷنيەجٷزٸ قازاقتارىنىڭ IV قۇرىلتايىنا دەلەگات بولىپ كەلدٸ. ەكەۋٸ دە قازٸر تالعاتتى تۋعان باۋىرىنداي كٶرەدٸ.
جۋرناليست قيىرداعى قانداستارىن ٸزدەۋٸن ەلٸ دە توقتاتقان جوق. بٸر كەزدەگٸ قاز گۋ-دٸڭ فيزيكا فاكۋلتەتٸنٸڭ تٷلەگٸ, بٷگٸنگٸ رەسەيدٸڭ بيزنەس-لەديٸ, حاتشىدان ٶسٸپ باسشى بولعان گٷلجان مولداجانوۆا جٶنٸندە قالام تەربەدٸ. رەسەي بالەت اكادەميياسىنىڭ كٶركەمدٸك جەتەكشٸسٸ, اتاقتى مارييا تەاترىنىڭ پريما-بالەريناسى بولعان التىناي اسىلمۇراتوۆانى ٸزدەپ باردى. جولىعا الماي قايتتى. بالەرينا جاپونيياعا كەتٸپ قالىپتى. ەندٸ بۇيىرسا, تاعى دا رەسەيگە جول تارقالى وتىر. وسى ەلدەگٸ ٷلكەن ەسكەري زاۋىتتا باس كونسترۋكتور بولىپ ٸستەيتٸن مىقتى قازاق بار. سول جٸگٸتپەن دە جولىقپاق. جۇمىسىنىڭ بەرٸ قۇپييا, سول سەبەپتٸ ەزٸرگە اتى-جٶنٸن دە قۇپييا ۇستاي تۇرايىق. ەنشەيٸندە جاعى سەمبەيتٸن تالعات كەيٸپكەرلەرٸن قاشان جۇرتقا تانىستىرعانشا جارنامالاي بەرمەيدٸ. «بٸر كٷنٸ موزامبيكتە مينيستر بولىپ ٸستەيتٸن قازاقتى تاۋىپ بەرسەم, تاڭ قالماڭدار», — دەپ ەزٸلدەيدٸ. سوندايدا بٸر كەزدە ەلەكتريك بولىپ قارق قىلماعان, بەيٸمٸ مەن بٸلٸمٸ جەتە تۇرا سپورت جۋرناليسٸ بولۋ مٷمكٸندٸگٸ قولىنان سۋسىپ شىعىپ كەتكەن ەرٸپتەسٸم ناعىز ٶز جولىن ەندٸ تاپقانداي كٶرٸنەدٸ.
تبيليسي, تالعات جەنە «كيندزماراۋلي»…
قىزمەتٸنٸڭ قاي-قايسىسى دا ەكٸ رەتتەن بۇيىرعانىن ايتىپ ەدٸك قوي. سونىسى تاعى دا قايتالاندى. تالعات باتىرحان بىلتىر «استانا حابارى» گازەتٸ باس رەداكتورىنىڭ ورىنباسارى بولىپ تاعايىندالدى. ەيگٸلٸ 11-شٸ قالامۇشىن سييا ساۋىتىنا مالىپ الىپ, جۇمىسىنا كٸرٸستٸ. باسكەتبولدىڭ بەيتەرەگٸ ەلجاندى حالقىمەن قايتا تابىستىردى. دٷركٸن-دٷركٸن قالام تەربەپ, مەسكەۋدٸ مەكەندەيتٸن مارعاسقاعا ەلدٸڭ نازارىن اۋداردى. قوعامدىق پٸكٸرگە قۇلاق قويعان اتپال ازاماتتار اتاقتى سپورتشىنى ەلگە شاقىرىپ, سىي-سيياپات كٶرسەتتٸ. تالعاتتىڭ باستاماسىمەن ەلجان استاناعا ەلدەن شالعايدا جٷرگەن قانداستارىمىزدىڭ كەزدەسۋٸنە كەلدٸ. بۇل ٷش كٷن بويى قاسىندا جٷردٸ. قازٸر داڭقى دٷنيە جٷزٸنە بەلگٸلٸ دارابوز ۇلعا قازاق جۇرتىنا بٸرجولا قونىس اۋدارۋ جٶنٸندە ۇسىنىستار ايتىلا باستادى. ەلجان اعاسى وسىنىڭ بەرٸنە رازى. ٶزٸنٸڭ بەلٸنەن كەلەتٸن تالعاتقا مەيٸرلەنە قاراپ, قايتا-قايتا راحمەتٸن ايتتى. ستۋدەنت كەزٸنەن ەن تاققان ەڭ «ەجەلگٸ» كەيٸپكەرٸ ۆاحتانگ كيكابيدزەنٸ ٸزدەپ, تبيليسيگە بارىپ قايتقانىن ايتساڭشى. اتاقتى اكتەردٸڭ شاڭىراعىندا تٷستەنٸپ وتىرىپ, ساليقالى سۇحبات الدى. ميلليونداردىڭ جٷرەگٸن جاۋلاعان ميمينو ماڭدايى تەرشٸپ وتىرىپ, شيراق عاسىردان بەرٸ سوڭىنا «شىراق الىپ تٷسٸپ جٷرگەن» قازاق جٸگٸتٸنە بٸراز ەڭگٸمە شەرتتٸ. گٷرجٸستاننىڭ كەز-كەلگەن اۋىلى تۋرالى ازدى-كٶپتٸ مەلٸمەتٸ بار تالعاتقا ىقىلاسى تٷسكەن سەرٸ ۆاحتانگ ەلدٸڭ باس سۋسىنى — ەيگٸلٸ «كيندزماراۋلي» شارابىن ٶزٸنٸڭ جەرتٶلەسٸنەن الىپ شىعىپ, اتا-باسىنان كەلە جاتقان جەكە مٷيٸزقۇتىسىنا قۇيىپ, بٸلەك ايقاستىرىپ ٸشۋدٸ ۇسىنعان ەكەن, شاراپ تٷگٸلٸ سىرانى سٸمٸرٸپ كٶرمەگەن شٶلدە ٶسكەن شٷرەگەي سەكٸلدٸ بۇل ات-تونىن الا قاشىپتى. سەبەبٸ, مٷيٸزقۇتىنى بوساتپاي ٸشۋ يٸسٸ گرۋزيننٸڭ دەستٷرٸندە جوق. ٶيتكەنٸ, بۇل ىدىستى تٸگٸنەن تٸك قويا المايسىڭ. جانتايىپ, قۇلاي كەتەدٸ. ٶزگەگە ٶزٸن سىيلاتىپ ٷيرەنگەن ٶر مٸنەز كيكابيدزە قازاق ٸشٸنەن كەلگەن ەلگەزەك گرۋزينتانۋشىعا سوندا دا رەنجٸمەپتٸ. ەكەۋٸ سول جولى بٸلەك ايقاستىرماسا دا, جٷرەك «ايقاستىرىپ» قايتقان سيياقتى.
از جازادى, بٸراق ساز جازادى. بٸردە تالعاتتىڭ ٷيٸنەن وسىدان جيىرما تٶرت جىل بۇرىن وعان ٶزٸم سىيلاعان ەدەمٸ بلوكنوتتى تاۋىپ الدىم. كاز گۋ-دٸڭ ەلۋ جىلدىعىنا ارنايى شىعارىلعان وسى بٸر دٷنيەنٸ ۋنيۆەرسيتەت وركەسترٸنٸڭ مٷشەلەرٸنە تاراتىپ بەرٸپ ەدٸ. مەن ونى تالعاتقا تارتۋ ەتتٸم. بىلاي دەپ جازىپپىز: «جىلدار ٶتەر… عۇمىر جەتسە:
بۇل كٷندەرٸ بٸزدەردەن جوعالىپتى ەن,
ەلٸ تالاي اتادى اعارىپ تاڭ.
ول تالعاتقا شال تالعات ۇقسامايدى,
نە قالدى ەكەن باياعى وماروۆتان?! —
دەپ كابينەتٸندە ىڭىرانىپ وتىراتىن قارت جۋرناليست بولارسىڭ. سول كەزدە الماتىنى شارلاعان سان ٸزٸمٸزدٸ (ماقساتتى-ماقساتسىز) ەسكە الارسىڭ دەپ وسى بلوكنوتتى ۇسىندىم. 12.12.84». تٶرتٸنشٸ كۋرستا سىيلاعان وسى بلوكنوتىم تاپ-تازاسىمەن تۇر ەكەن. «كٶڭٸلٸمنٸڭ تازالىعىنداي عوي», — دەيدٸ ٶزٸ. بەلكٸم, بۇل دا ونىڭ ەر سٶيلەمٸن ون ويلانىپ, توعىز تولعانىپ جازاتىن تەكتٸلٸگٸنٸڭ بەلگٸسٸ شىعار.
كيكابيدزەگە تەگٸننەن تەگٸن ٷيٸرسەكتەپ جٷرگەن جوق. كينو ەلەمٸن سۇمدىق جاقسى كٶرەتٸن. كٶرمەگەن كينوسى, امانداسپاعان اكتەرٸ جوق. كەز كەلگەن كينوسىنشىمەن تٶرت ساعات تەجٸكەلەسە الادى. بالا كەزٸندەگٸ بٸر ارمانى كينورەجيسسەر بولۋ ەدٸ. بٸراق مۇنى اۋىل بالاسىنىڭ قولى جەتپەيتٸن ماماندىق دەپ ەسەپتەدٸ.
بٸراق بۇل ەۋلەتتەن كينونىڭ اۋىلى الىستامايتىن سيياقتى. سەبي كٷنٸنەن ەكەسٸنٸڭ ەڭگٸمەسٸن قۇلاعىنا قۇيىپ ٶسكەن قىزى اقبوتا كينورەجيسسەر بولۋعا بەل بۋدى. باسىنداعى بٸلٸمٸ قۇلاعىنان اعىپ جٷرەتٸن تالعاتتىڭ ارمانىنا اينالعان بيٸكتەردٸ باعىندىرۋ ٷشٸن اق تۇماندى البيونعا اتتاندى. قازٸر ەلباسىنىڭ «بولاشاق» ستيپەنديياسىن يەلەنگەن ول لوندونداعى سارري ۋنيۆەرسيتەتٸنٸڭ كينەماتوگرافييا فاكۋلتەتٸندە وقيدى. جٷزدەن جٷيرٸك, مىڭنان تۇلپار شىققان اقبوتا باتىرحان ۇلىلارعا ۇيا بولعان ۇلىبريتانييادا ۇلىق ٶنەردٸ يگەرٸپ جاتىر.
ٶزٸ جاسىنان شىعارمالارىن سٷيٸپ وقىعان ورالحانشا ايتساق, تالعاتقا تٸزگٸنٸن ۇستاتپاي قويعان «تورتاي مٸنگەن اقبوزات» ٶزگەنٸڭ ەمەس, ٶز پەرزەنتٸنٸڭ تاقىمىندا كەتتٸ… تەۋبە!
باۋىرجان ومارۇلى
