ەلوردا مەكتەپتەرٸندەگٸ باستاۋىش سىنىپتارعا مەملەكەت ەسەبٸنەن تەگٸن بەرٸلەتٸن تاماقتىڭ مەزٸر قۇنى 30 پايىز ٶسەدٸ. وسىلايشا 2023 جىلدىڭ 1 قاڭتارىنان باستاپ باستاۋىش سىنىپتاعى بٸر وقۋشىنىڭ كٷن سايىن تاماقتانۋىنا قازٸرگٸ 449,5 تەڭگەنٸڭ ورنىنا 581 تەڭگە بٶلٸنەدٸ, دەپ حابارلايدى قازاقپارات.
بۇل تۋرالى استانا كەسٸپكەرلەرٸنٸڭ قۇقىقتارىن قورعاۋ جٶنٸندەگٸ كەڭەستٸڭ كەزەكتٸ وتىرىسىندا مەلٸم بولدى.
استانا قالاسى كەسٸپكەرلەر پالاتاسىنىڭ ديرەكتورى بەيسەن جولبولديەۆتٸڭ سٶزٸنە قاراعاندا, كەيٸنگٸ 3-4 جىلدىڭ ٸشٸندە بٸر بالاعا 449 تەڭگە قاراستىرىلعان.
«قاراساڭىز تاماق باعاسى جىلىنا بٸرنەشە رەت قىمباتتاپ جاتىر. بٸزدە مەكتەپتەرگە تاماقتاندىرۋ قىزمەتٸن ۇسىناتىن كەسٸپورىنداردىڭ قاۋىمداستىقتارى بار. ولاردىڭ ايتۋىنشا, بٷگٸنگٸ تاڭدا بٸر بالاعا شاققانداعى تاماقتاندىرۋ قاراجاتى كەمٸندە 1000 تەڭگە بولۋ كەرەك. بۇل مەسەلەنٸ بٸز كٶتەرگەن كەزدە 1 قاراشادان باستاپ 600 تەڭگەگە, ودان كەيٸن 2023 جىلدىڭ 1 قاڭتارىنان باستاپ 1000 تەڭگەگە كٶتەرۋ كەرەك ەدٸ. بٸزگە سونداي ۋەدە بەرٸلگەن. بٸراق قازٸر 449 تەڭگە سول قالپى قالىپ وتىر. بۇل كەسٸپكەرلەر قۇقىعىنا عانا قاتىستى مەسەلە ەمەس. تاماقتاندىرۋ تيٸستٸ دەڭگەيدە بولماسا, بالالاردىڭ فيزيولوگييالىق دامۋىنا زييان كەلۋٸ مٷمكٸن. مەكتەپ اسحاناسىنداعى اس مەزٸرٸن قايتا قاراۋ كەرەك. قازٸر مەزٸرلەردٸڭ ساپاسى تٶمەندەپ كەتكەن. مەملەكەتتٸڭ بٸر بالاعا دەپ بٶلەتٸن اقشاسى جەتپەگەندٸكتەن كەسٸپكەرلەر ٷنەمدەۋگە كٶشەدٸ. ولار ٶزدەرٸن شىعىنعا باتىرىپ جۇمىس ٸستەمەيدٸ عوي. ولار بۇل ٸسكە پايدا تابۋ ٷشٸن بارىپ وتىر», - دەدٸ پالاتا ٶكٸلٸ.
قالالىق بٸلٸم باسقارماسى باسشىسىنىڭ ورىنباسارى ريمما يمانعازينوۆا جاڭا جىلدان باستاپ باستاۋىش سىنىپتاردى تاماقتاندىرۋعا بيۋدجەتتەن بٶلٸنەتٸن قارجى كٶبەيەتٸنٸن جەتكٸزدٸ.
بٸراق ونىڭ بٸر بالاعا شاققانداعى قۇنى كەسٸپكەرلەر تالاپ ەتٸپ وتىرعان مەجەدەن ەلدەقايدا تٶمەن بولماق.
«مەكتەپتە تاماقتاندىرۋ قىزمەتٸن كٶرسەتەتٸندەرمەن تامىز ايىنان بەرٸ بٸرنەشە رەت كەزدەستٸك. ونىڭ ٸشٸندە تاماق ساپاسى تۋرالى دا, باعاسى تۋرالى دا مەسەلە قارالعان. №598 بۇيرىققا ٶزگەرٸستەر ەنگٸزٸلگەن. ول ٶزگەرٸستەردٸ بٸرنەشە مەرتە قارادىق. نەگٸزٸنەن 107, 108 پۋنكتەرگە قاتىستى سۇراقتار تۋىنداعان. يە, بٸز بٸر بالاعا بٶلٸنەتٸن قارجى كٶلەمٸن ۇلعايتۋ كەرەكتٸگٸن ايتقانبىز. بٸراق بيۋدجەت اقىنى كٶتەرۋدٸ قولداي المادى. ەندٸ تاماقتاندىرۋ قۇنىن 2023 جىلدىڭ قاڭتارىنان باستاپ 30 پايىز كٶتەرۋ جوسپارلانىپ وتىر. قازٸر بٸر بالانى تاماقتاندىرۋعا كٷن سايىن 449 تەڭگە 50 تيىن بٶلٸنسە, قاڭتاردان باستاپ 584 تەڭگە بولادى. بۇل - ورتاشا باعا. ٶڭٸرلەردەگٸ باعانى قارادىق. ەڭ ٷلكەن باعا 600 تەڭگەنٸڭ اينالاسىندا بولىپ شىقتى», - دەدٸ باسقارما باستىعى ريمما يمانعازينوۆا.
