Elorda mektepterindegi bastaýysh synyptarǵa memleket esebinen tegin beriletin tamaqtyń mázir quny 30 paiyz ósedi. Osylaisha 2023 jyldyń 1 qańtarynan bastap bastaýysh synyptaǵy bir oqýshynyń kún saiyn tamaqtanýyna qazirgi 449,5 teńgeniń ornyna 581 teńge bólinedi, dep habarlaidy QazAqparat.
Bul týraly Astana kásipkerleriniń quqyqtaryn qorǵaý jónindegi keńestiń kezekti otyrysynda málim boldy.
Astana qalasy kásipkerler palatasynyń direktory Beisen Jolboldievtiń sózine qaraǵanda, keiingi 3-4 jyldyń ishinde bir balaǵa 449 teńge qarastyrylǵan.
«Qarasańyz tamaq baǵasy jylyna birneshe ret qymbattap jatyr. Bizde mektepterge tamaqtandyrý qyzmetin usynatyn kásiporyndardyń qaýymdastyqtary bar. Olardyń aitýynsha, búgingi tańda bir balaǵa shaqqandaǵy tamaqtandyrý qarajaty keminde 1000 teńge bolý kerek. Bul máseleni biz kótergen kezde 1 qarashadan bastap 600 teńgege, odan keiin 2023 jyldyń 1 qańtarynan bastap 1000 teńgege kóterý kerek edi. Bizge sondai ýáde berilgen. Biraq qazir 449 teńge sol qalpy qalyp otyr. Bul kásipkerler quqyǵyna ǵana qatysty másele emes. Tamaqtandyrý tiisti deńgeide bolmasa, balalardyń fiziologiialyq damýyna ziian kelýi múmkin. Mektep ashanasyndaǵy as mázirin qaita qaraý kerek. Qazir mázirlerdiń sapasy tómendep ketken. Memlekettiń bir balaǵa dep bóletin aqshasy jetpegendikten kásipkerler únemdeýge kóshedi. Olar ózderin shyǵynǵa batyryp jumys istemeidi ǵoi. Olar bul iske paida tabý úshin baryp otyr», - dedi palata ókili.
Qalalyq bilim basqarmasy basshysynyń orynbasary Rimma Imanǵazinova jańa jyldan bastap bastaýysh synyptardy tamaqtandyrýǵa biýdjetten bólinetin qarjy kóbeietinin jetkizdi.
Biraq onyń bir balaǵa shaqqandaǵy quny kásipkerler talap etip otyrǵan mejeden áldeqaida tómen bolmaq.
«Mektepte tamaqtandyrý qyzmetin kórsetetindermen tamyz aiynan beri birneshe ret kezdestik. Onyń ishinde tamaq sapasy týraly da, baǵasy týraly da másele qaralǵan. №598 buiryqqa ózgerister engizilgen. Ol ózgeristerdi birneshe márte qaradyq. Negizinen 107, 108 pýnkterge qatysty suraqtar týyndaǵan. Iá, biz bir balaǵa bólinetin qarjy kólemin ulǵaitý kerektigin aitqanbyz. Biraq biýdjet aqyny kóterýdi qoldai almady. Endi tamaqtandyrý qunyn 2023 jyldyń qańtarynan bastap 30 paiyz kóterý josparlanyp otyr. Qazir bir balany tamaqtandyrýǵa kún saiyn 449 teńge 50 tiyn bólinse, qańtardan bastap 584 teńge bolady. Bul - ortasha baǵa. Óńirlerdegi baǵany qaradyq. Eń úlken baǵa 600 teńgeniń ainalasynda bolyp shyqty», - dedi basqarma bastyǵy Rimma Imanǵazinova.
