گەرمانيياداعى اۋرۋحانادا جاتقان كرەمل سىنشىسى الەكسەي ناۆالنىيدى "ۋلاناردان بۇرىن" سٸبٸرگە بارعان ساپارىندا رەسەيلٸك فەدەرالدىق قاۋٸپسٸزدٸك قىزمەت (فسب) ٶكٸلدەرٸ اڭدىعان. رەسەيلٸك "موسكوۆسكيي كومسومولەتس" باسىلىمى وسىلاي دەپ حابارلادى.
رەسەيدٸڭ قاۋٸپسٸزدٸك قىزمەتٸندەگٸ دەرەككٶزگە سٷيەنگەن باسىلىمنىڭ جازۋىنشا, فسب قىزمەتكەرلەرٸ سٸبٸردە ناۆالنىيدىڭ ەربٸر قادامىن اڭدىپ وتىرعان. وپپوزيتسييالىق ساياساتكەردٸڭ باسپاسٶز حاتشىسى كيرا يارمىش 23 تامىزدا Twitter جەلٸسٸندە "اڭدۋ تاڭدانارلىق نەرسە ەمەس, تەك وسىنداي اقپاراتتىڭ ەگجەي-تەگجەيٸنە دەيٸن ايتىلۋى تاڭعالارلىق نەرسە" دەپ جازدى.
ول بۇعان دەيٸن ناۆالنىي 20 تامىزدا تومسك ەۋەجايىندا شەي ساتىپ الىپ, ٸشكەننەن كەيٸن ۋلانعان دەپ ايتقان ەدٸ.
گەرمانييا پوليتسيياسى 23 تامىزدا ناۆالنىي جاتقان اۋرۋحاناداعى قاۋٸپسٸزدٸكتٸ كٷشەيتتٸ. ناۆالنىي گەرمانييا اۋرۋحاناسىنا انگەلا مەركەلدٸڭ قوناعى ەسەبٸندە جاتقىزىلعان. نەمٸس باسىلىمدارىنىڭ اقپاراتىنا قاراعاندا مۇنداي مەرتەبە ناۆالنىيدىڭ قاۋٸپسٸزدٸگٸن بارىنشا كٷشەيتۋگە مٷمكٸندٸك بەرەدٸ.
44 جاستاعى ناۆالنىي ەلٸ ەسٸن جيعان جوق, اۋرۋحانا جەتەكٸشٸلٸگٸ دياگنوستيكا تولىق اياقتالىپ, نەتيجەسٸ شىققان سوڭ عانا ساياساتكەردٸڭ جاعدايى تۋرالى اقپارات بەرەتٸنٸن ايتتى.
