وي-پٸكٸرٸمٸز قانداي بولسا دا – تەۋەلسٸزدٸگٸمٸزگە كەرٸ ەسەرٸ بولماۋى كەرەك. «بايتاق بولاشاق» ەكولوگييالىق اليانسىنىڭ تٶراعاسى ازاماتحان ەمٸرتاەۆ قر پرەزيدەنتٸ قاسىم-جومارت توقاەۆتىڭ «Egemen Qazaqstan» گازەتٸندە جارييالانعان ماقالاسىنا قاتىستى وسىنداي پٸكٸر بٸلدٸردٸ, دەپ حابارلايدى قازاقپارات.
«مەملەكەت باسشىسى ماقالاسىندا تەۋەلسٸزدٸگٸمٸز تٶبەدەن تٷسپەگەندٸگٸن, بابامىزدان قالعان امانات ەكەنٸن ايتىپ, ۇلتتىق قۇندىلىق مەسەلەلەرٸنە تەرەڭٸنەن قاراعان. راسىمەن دە مەملەكەتٸمٸزدٸ كٷشەيتۋ ٷشٸن ەڭ الدىمەن ۇلتتىق رۋحىمىزدى كٶتەرۋٸمٸز كەرەك. ال ۇلتتىق رۋح تاريحي تامىرىمىزبەن تىعىز بايلانىستى. پرەزيدەنت وسى مەسەلەگە كٶپ كٶڭٸل بٶلۋدە», - دەيدٸ ازاماتحان ەمٸرتاەۆ.
ول پرەزيدەنت ماقالاسىندا جازىلعان ويدىڭ بەرٸمەن كەلٸسەتٸنٸن ايتتى.
«بٸز كەڭەس وداعى تۇسىندا ٶستٸك. بٸز وقىعان تاريحتىڭ ٶزٸ كەڭەس وداعى تاريحشىلارى جازعان ەڭبەك ەدٸ. بٸز سول كەزەڭدە بولماعان رۋحىمىزدى جاڭعىرتۋىمىز كەرەك. بٸز كەڭ بايتاق جەردە تۇرعان باتىر بابالاردىڭ ۇرپاعىمىز. قازٸرگٸ ۋاقىتتا تاريحي فيلمدەر تٷسٸرٸلٸپ جاتىر. بۇل دا ٶتە دۇرىس باستاما دەپ سانايمىن. بٸزدٸڭ پرەزيدەنتٸمٸز مىقتى ديپلومات, مىقتى ساياساتكەر. ول ۇلتتىق يدەولوگييانى قالاي جٷرگٸزۋ كەركتٸگٸن جاقسى بٸلەدٸ», - دەيدٸ ول.
سونداي-اق, ول مەملەكەت باسشىسى ساياسي رەفورمالارعا قاتىستى ورىندى ويلار جازعانىن ايتتى.
«ەلەم ٶزگەرٸپ جاتقان كەزدە قازاقستان سول باياعى جوسپارلى ەكونوميكامەن, تەك قانا مۇنايدان تٷسكەن قارجىنى جاراتىپ ٶمٸر سٷرە المايدى. سوندىقتان بٸزگە ساياسي, ەكونوميكالىق رەفورما مٸندەتتٸ تٷردە كەرەك. پرەزيدەنت ەلٸمٸزدە كٶپ پارتييا بولۋ كەرەكتٸگٸن, پٸكٸر دە, كٶزقاراس تا ەرالۋان بولعانى دۇرىس ەكەنٸن, بٸراق سونىڭ بەرٸ ۇلتتىق قۇندىلىقتارعا قاتىستى بٸر جەردە توعىسۋى كەرەكتٸگٸن ايتتى. دەمەك, وي-پٸكٸرٸمٸز قانداي بولسا دا – تەۋەلسٸزدٸگٸمٸزگە كەرٸ ەسەرٸ بولماۋى كەرەك. ساياسي رەفورما – زامان تالابى. مەملەكەت باسشىسىنىڭ تٶرتٸنشٸ ونجىلدىققا قويعان ماقسات, باعدارى – دۇرىس, ەندٸ ونىڭ ٸسكە اسۋىن قوعام بولىپ قولداۋىمىز كەرەك», - دەيدٸ ول.
ەسكە سالا كەتسەك, بٷگٸن قازاقستان رەسپۋبليكاسىنىڭ پرەزيدەنتٸ قاسىم-جومارت توقاەۆ «Egemen Qazaqstan» گازەتٸندە «تەۋەلسٸزدٸك بەرٸنەن قىمبات» اتتى ماقالا جارييالادى.
