اتىراۋلىق كٶپ بالالى انا پرەزيدەنتتەن كٶمەك سۇرايدى

اتىراۋ وبلىسى ەكٸمٸ نۇرلان اسقارۇلى نوعاەۆتىڭ,

اتىراۋ قالاسى ەكٸمٸ اليمۇحاممەد قۇتتۇمۇراتۇلىنىڭ

نازارىنا!

Ult.kz پورتالىنىڭ رەداكتسيياسىنا اتىراۋ قالاسىنىڭ تۇرعىنى, كٶپ بالالى انا ابۋوۆا مايرا حاميتقىزى حابارلاسىپ, ارىز-شاعىمىن ايتتى. ٷي-كٷيسٸز, جۇمىسسىز تٸرشٸلٸك كەشٸپ جٷرگەن 7 بالالى انا امالى تاۋسىلعاندىقتان, ەلباسىنىڭ اتىنا حات جازۋدى سۇرايدى. "التىن القالى" انانىڭ جالعىز ارمان-تٸلەگٸ - باسپانا مۇقتاجدىعىنىڭ اۋىر ازابىنان ايىعۋ.

«اتىراۋ قالاسىندا تۇرامىن. كٶپ جىلدان بەرٸ ٷي كەزەگٸندە, جەر كەزەگٸندە تۇرمىن. ٷي كەزەگٸندە بىلتىر 3608-شٸ بولىپ تۇر ەكەنمٸن. ال, جەر كەزەگٸندە 2014 جىلى 385-شٸ بولىپ تٸركەلگەن ەدٸم, 2017-گە دەيٸن 382-گە ٷش ورىن عانا جىلجىپتى. ودان كەيٸن ەلسٸن-ەلسٸن قاراي بەرۋگە ٷمٸتٸم ٷزٸلگەندەي بولدى. جاسىمىز بولسا 50-گە كەلٸپ قالدى. كەزەگٸمٸز ەندٸ 10 جىلدان كەيٸن كەلە مە, كەلمەي مە, قۇداي بٸلسٸن. 7 بالانىڭ اناسىمىن. «كٷمٸس القا» مەن «التىن القا» يەلەرٸنٸڭ قاتارىنانمىن. ەڭ كٸشكەنتايىم 3-كە تولادى. 7 جاستاعى بالامنىڭ قۇلاعى ەستٸمەيدٸ. ينۆاليد. مٷگەدەك بالالارعا ارنالعان مەكتەپكە بارادى. ٶزٸمٸز پەتەر جالداپ تۇرامىز. اي سايىن 50 مىڭ تەڭگە تٶلەيمٸز. «پەتەر» دەپ ەسپەتتەپ ايتقانمەن, قۋىقتاي بٶلمە. پەتەراقىسىن تٶلەي الماي جٷرگەنٸمٸزگە ەكٸ اي بولدى. يەلەرٸ «شىعىڭدار» دەپ قۋىپ جاتىر. كٷيەۋٸم دە, ٶزٸم دە جۇمىستا جوقپىز», دەيدٸ مايرا.

2016 جىلى اتىراۋ قالاسى ەكٸمٸ شاپكەنوۆ سەرٸك جامبىلۇلىنىڭ اتىنا ارىز جازىپ, قىزىنىڭ سىرقاتىنا بايلانىستى جەردەم سۇراعان ەكەن. ەيتكەنمەن, «ەشقانداي باسىم قۇقىقتىڭ جوقتىعىن» العا تارتقان ەكٸمشٸلٸك قىزمەتكەرلەرٸ, ٶتٸنٸشتٸ قاناعاتتاندىرماعان ەكەن.

ٶتكەن جىلى «نۇر وتانعا» بارىپ, جاعدايىن ايتىپ, كٶمەك سۇراپتى. الايدا ول جاقتاعىلار «ٷي ەڭ بٸرٸنشٸ وتان سوعىسى اردەگەرلەرٸ مەن جەتٸم بالالارعا بەرٸلەدٸ. سودان كەيٸنگٸ كەزەك – سٸزدەردٸكٸ» دەپ جىلى شىعارىپ سالعان. «ەكٸمشٸلٸككە كٸرۋدٸڭ ماشاقاتى كٶپ. قابىلداۋعا جەتۋدٸڭ ٶزٸ مۇڭ» دەيدٸ انا.

«نۇروتاندىقتار» ارىزدانۋشى انانىڭ قىزىنىڭ مٷگەدەكتٸگٸن دە ەلەپ-ەسكەرمەي, ەسٸكتەن ەرتە قايتارىپتى. مەسەلەنٸ شەشۋگە قول ۇشىن بەرۋدٸڭ ورنىنا: «16 جاسقا تولعاننان كەيٸن ٶزٸ كەزەككە تۇرادى, سودان كەيٸن بارىپ ٷي الۋ مٷمكٸندٸگٸ قاراستىرىلادى» دەپ, جەتٸ جاسار بالاسىنىڭ ەرتەرەك ەسيۋٸن كٶكسەگەندەي كەيٸپ تانىتىپتى.

ەندٸ قايدا بارىپ كٶمەك سۇرارىن بٸلمەگەن انا, ەلباسىنا حات جازعىسى كەلەدٸ.

«باسقا سەنەرٸم قالمادى. اتىراۋداعى ەكٸم-قارالاردى حالىقتىڭ جاعدايى الاڭداتپاسا, مەملەكەت باسشىسىن حاباردار قىلۋدان باسقا امالىم جوق. مٷمكٸن بٸر قايىرى بولىپ قالار. ەشكٸمنٸڭ ەسٸگٸن قاقپاي-اق, ٶز كٷنٸمٸزدٸ ٶزٸمٸز كٶرەيٸك دەپ جان باعىپ جٷرسەك تە, تٸرشٸلٸك تاۋقىمەتٸ قىسىپ بارادى. كەشەگٸ بەس بالانىڭ قازاسى قابىرعامىزدى قايىستىرىپ, تٷنٸمەن ۇيىقتاي الماي-اق قويدىم. ٶز بالامىزداي بالالاردىڭ قىرشىنىنان قيىلعانى, جٷرەكتٸ اۋىرتتى. كٸپ-كٸشكەنتاي بٷلدٸرشٸندەردٸڭ اۋىر قازاسىن ەندٸ ەشكٸمنٸڭ باسىنا بەرمەسٸن» دەپ, اعىنان جارىلدى «التىن القالى» انا.

«جۇمىسسىز» دەگەن انىقتاما الايىن دەسە جاۋاپتى مەكەمەدەگٸلەر «مٷگەدەك بالاڭدى باعىپ وتىرعانىڭ ٷشٸن 24 مىڭ تەڭگە الىپ وتىرسىڭ» دەپ ول «سپراۆكاسىن» دا بەرمەي قويىپتى.

«ٷكٸمەتتٸڭ كٶپ بالالى انالارعا بەرەتٸن 16 مىڭ تەڭگەسٸ مەن مٷگەدەك بالاما بەرٸلەتٸن جەردەماقى جىرتىعىمىزعا دا جاماۋ بولمايدى. ەشكٸمدٸ كٷستانالاعىم كەلمەيدٸ. دەسەك تە, كٶپ بالالى انالارعا, مٷمكٸندٸگٸ شەكتەۋلٸ بالالارعا مەملەكەتتٸڭ قامقورلىعى كەرەك-اق», دەيدٸ مايرا حاميتقىزى.

6 اقپان كٷنٸ استانا, الماتى قالالارىندا بٸر توپ انا ەكٸمشٸلٸك عيماراتىنىڭ الدىنا بارىپ, ٶز تالاپتارىن جەتكٸزگەن بولاتىن. كەشەلٸ-بەرٸ ەلەۋمەتتٸك جەلٸلەردە جۇرتشىلىقتىڭ باسپانا جاعدايى مەن بالالارعا تٶلەنەتٸن جەردەماقى مەسەلەسٸن كٶتەرۋٸ اتىراۋلىق كٶپ بالالى انانى دا بەي-جاي قالدىرماسا كەرەك.