Atyraý oblysy ákimi Nurlan Asqaruly Noǵaevtyń,
Atyraý qalasy ákimi Alimuhammed Quttumuratulynyń
nazaryna!
Ult.kz portalynyń redaktsiiasyna Atyraý qalasynyń turǵyny, kóp balaly ana Abýova Maira Hamitqyzy habarlasyp, aryz-shaǵymyn aitty. Úi-kúisiz, jumyssyz tirshilik keship júrgen 7 balaly ana amaly taýsylǵandyqtan, Elbasynyń atyna hat jazýdy suraidy. "Altyn alqaly" ananyń jalǵyz arman-tilegi - baspana muqtajdyǵynyń aýyr azabynan aiyǵý.
«Atyraý qalasynda turamyn. Kóp jyldan beri úi kezeginde, jer kezeginde turmyn. Úi kezeginde byltyr 3608-shi bolyp tur ekenmin. Al, jer kezeginde 2014 jyly 385-shi bolyp tirkelgen edim, 2017-ge deiin 382-ge úsh oryn ǵana jyljypty. Odan keiin álsin-álsin qarai berýge úmitim úzilgendei boldy. Jasymyz bolsa 50-ge kelip qaldy. Kezegimiz endi 10 jyldan keiin kele me, kelmei me, Qudai bilsin. 7 balanyń anasymyn. «Kúmis alqa» men «Altyn alqa» ieleriniń qatarynanmyn. Eń kishkentaiym 3-ke tolady. 7 jastaǵy balamnyń qulaǵy estimeidi. Invalid. Múgedek balalarǵa arnalǵan mektepke barady. Ózimiz páter jaldap turamyz. Ai saiyn 50 myń teńge tóleimiz. «Páter» dep áspettep aitqanmen, qýyqtai bólme. Páteraqysyn tólei almai júrgenimizge eki ai boldy. Ieleri «shyǵyńdar» dep qýyp jatyr. Kúieýim de, ózim de jumysta joqpyz», deidi Maira.
2016 jyly Atyraý qalasy ákimi Shapkenov Serik Jambylulynyń atyna aryz jazyp, qyzynyń syrqatyna bailanysty járdem suraǵan eken. Áitkenmen, «eshqandai basym quqyqtyń joqtyǵyn» alǵa tartqan ákimshilik qyzmetkerleri, ótinishti qanaǵattandyrmaǵan eken.
Ótken jyly «Nur otanǵa» baryp, jaǵdaiyn aityp, kómek surapty. Alaida ol jaqtaǵylar «úi eń birinshi Otan soǵysy ardegerleri men jetim balalarǵa beriledi. Sodan keiingi kezek – sizderdiki» dep jyly shyǵaryp salǵan. «Ákimshilikke kirýdiń mashaqaty kóp. Qabyldaýǵa jetýdiń ózi muń» deidi ana.
«Nurotandyqtar» aryzdanýshy ananyń qyzynyń múgedektigin de elep-eskermei, esikten erte qaitarypty. Máseleni sheshýge qol ushyn berýdiń ornyna: «16 jasqa tolǵannan keiin ózi kezekke turady, sodan keiin baryp úi alý múmkindigi qarastyrylady» dep, jeti jasar balasynyń erterek esiýin kóksegendei keiip tanytypty.
Endi qaida baryp kómek suraryn bilmegen ana, Elbasyna hat jazǵysy keledi.
«Basqa senerim qalmady. Atyraýdaǵy ákim-qaralardy halyqtyń jaǵdaiy alańdatpasa, Memleket basshysyn habardar qylýdan basqa amalym joq. Múmkin bir qaiyry bolyp qalar. Eshkimniń esigin qaqpai-aq, óz kúnimizdi ózimiz kóreiik dep jan baǵyp júrsek te, tirshilik taýqymeti qysyp barady. Keshegi bes balanyń qazasy qabyrǵamyzdy qaiystyryp, túnimen uiyqtai almai-aq qoidym. Óz balamyzdai balalardyń qyrshynynan qiylǵany, júrekti aýyrtty. Kip-kishkentai búldirshinderdiń aýyr qazasyn endi eshkimniń basyna bermesin» dep, aǵynan jaryldy «Altyn alqaly» ana.
«Jumyssyz» degen anyqtama alaiyn dese jaýapty mekemedegiler «múgedek balańdy baǵyp otyrǵanyń úshin 24 myń teńge alyp otyrsyń» dep ol «spravkasyn» da bermei qoiypty.
«Úkimettiń kóp balaly analarǵa beretin 16 myń teńgesi men múgedek balama beriletin járdemaqy jyrtyǵymyzǵa da jamaý bolmaidy. Eshkimdi kústanalaǵym kelmeidi. Desek te, kóp balaly analarǵa, múmkindigi shekteýli balalarǵa memlekettiń qamqorlyǵy kerek-aq», deidi Maira Hamitqyzy.
6 aqpan kúni Astana, Almaty qalalarynda bir top ana ákimshilik ǵimaratynyń aldyna baryp, óz talaptaryn jetkizgen bolatyn. Kesheli-beri áleýmettik jelilerde jurtshylyqtyń baspana jaǵdaiy men balalarǵa tólenetin járdemaqy máselesin kóterýi atyraýlyq kóp balaly anany da bei-jai qaldyrmasa kerek.
«Búgin Atyraý qalasynda «miting» bolsa, kóshege shyǵyp, bizdi alańdatqan máselelerdi el aldynda aitqym kelip edi» deidi ol.
Atalǵan máseleni Atyraý oblysy ákimdigi, Atyraý qalasy basshylyǵy óz nazaryna alyp, kóp balaly ananyń muń-muqtajyn sheshýge qol ushyn sozady dep senemiz.
Abýova Maira Hamitqyzynyń bailanys nomeri: 87027287282
Ult portaly
Kópshilik oqyrmanǵa dáleldi bolýy úshin negizgi qujattardy jariia etip otyrmyz:
