ارمەنييادا ساياسي جاعداي ۋشىعىپ بارادى. 2 ناۋرىزدا پرەزيدەنت ارمەن ساركيسيان قارۋلى كٷشتەر باسشىسىن قىزمەتٸنەن بوساتۋ تۋرالى بۇيرىققا قول قويۋدان باس تارتتى.
ٶتكەن اپتادا ەسكەري باسشىلار پرەمەر-مينيستر نيكول پاشينياندى وتستاۆكاعا كەتۋگە شاقىرعاننان كەيٸن پاشينيان ەلدە "ەسكەري تٶڭكەرٸس جاساۋ تالپىنىسى" بولدى دەپ مەلٸمدەپ, قارۋلى كٷشتەر باسشىسىن قىزمەتٸنەن بوساتقان.
پرەزيدەنت ارمەن ساركيسيان قارۋلى كٷشتەر باسشىسى ونيك گاسپارياندى قىزمەتٸنەن بوساتۋ تۋرالى بۇيرىققا ەكٸنشٸ رەت قول قويۋدان باس تارتىپ وتىر.
الايدا پرەزيدەنت گاسپارياندى ورنىنان الۋ قانشالىقتى زاڭدى بولادى دەپ كونستيتۋتسييالىق كەڭەسكە سۇراۋ سالماعان. ال زاڭ ساراپشىلارىنىڭ ايتۋىنشا, ەگەر مەملەكەت باسشىسى 4 ناۋرىزعا دەيٸن جوعارعى سوتقا اپەللياتسييا تٷسٸرمەسە, قىزمەتٸنەن بوساتۋ تۋرالى بۇيرىق اۆتوماتتى تٷردە كٷشٸنە ەنەدٸ.
پاشينيان مەن وپپوزيتسييا جاقتاستارى ەرەۆاندا كٷن سايىن ميتينگٸلەر ٶتكٸزٸپ جاتىر.
بىلتىر كٷزدە ەزەربايجان مەن ەتنيكالىق ارميان كٷشتەرٸ اراسىندا تاۋلى قاراباق ٷشٸن التى اپتاعا سوزىلعان سوعىستان كەيٸن پاشينيان وتستاۆكاسىن تالاپ ەتۋشٸلەر كٶبەيگەن. ەلدە نارازىلىق كٶڭٸل-كٷي ارتقان. كٶپتەگەن ارميان قاراباقتا اتىستى توقتاتۋ كەلٸسٸم شارتتارىمەن كەلٸسپەيدٸ. وسى كەلٸسٸمنٸڭ نەتيجەسٸندە ارمەنييا تاۋلى قاراباقتاعى بٸراز اۋماقتى باقىلاۋ قۇقىعىنان ايىرىلعان جەنە 1990 جىلدارى ارميان كٷشتەرٸ جاۋلاپ العان جەتٸ اۋداندى ەزەربايجانعا قايتارعان.
تاۋلى قاراباق سوعىسى كەزٸندە قولدانىلعان رەسەيلٸك قارۋلارعا ساراپتاما جاساعان پاشينياننىڭ سٶزٸن بۇعان دەيٸن قارۋلى كٷشتەر جەتەكشٸسٸنٸڭ ورىنباسارى تيران حاچاترييان مىسقىلداعاننان كەيٸن پاشينيان ونى قىزمەتٸنەن العان. بۇل شەشٸم قارۋلى كٷشتەردٸ نارازى ەتٸپ, بۇعان جاۋاپ رەتٸندە قارۋلى كٷشتەردەگٸ ونداعان قىزمەتكەر پاشينيان مەن ٷكٸمەتتٸ "ەلدٸ كٷيرەتۋگە از قالدى" دەپ ايىپتاپ, وتستاۆكاعا كەتۋگە شاقىرعان.
ال پاشينيان بۇل قادامدى "ەسكەري تٶڭكەرٸس جاساۋ تالپىنىسىنا" تەڭەپ, گاسپارياندى دەرەۋ قىزمەتٸنەن بوساتۋ تۋرالى بۇيرىق شىعارعان.
پارلامەنتتەگٸ ورىنداردىڭ باسىم بٶلٸگٸنە يە "مەنٸڭ قادامىم" اتتى فراكتسييانى باسقاراتىن پاشينيان وپپوزيتسييا تالابىن كەرٸ قايتارعان, بٸراق وپپوزيتسييا بٸرقاتار شارتتى ورىنداسا كەزەكتەن تىس سايلاۋ ٶتكٸزۋگە ەزٸر ەكەنٸن ايتقان.
