پاۆلودار وبلىسىندا كەمەلەتكە تولماعان قىز بالالاردى بٸرنەشە جىل بويى زورلاپ كەلگەن ايىپتالۋشىعا قاتىستى سوت ٷكٸمٸ شىقتى, دەپ حابارلايدى "ۇلت اقپارات".
قىلمىستىق ٸس پاۆلودار وبلىستىق قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىندا قارالعان.
القا بيلەردٸڭ قاتىسۋىمەن ٶتكەن سوتتا ايىپتالۋشىعا قىلمىستىق كودەكستٸڭ بٸرنەشە بابى (120, 121, 296, 287 باپتارىنىڭ بٶلٸكتەرٸ) بويىنشا ايىپ تاعىلعان.
«سوت بارىسىندا ج. اتتى ازاماتتىڭ 2016 جىلعى 26 ناۋرىز بەن 2020 جىلعى 4 قاڭتار ارالىعىندا كەمەلەتكە تولماعان قىزداردى زورلاعانى انىقتالعان. سونىمەن قاتار كەمەلەتكە تولماعان ٷش قىزعا سەكسۋالدى سيپاتتاعى زورلىق ەرەكەتٸن جاساعان. ونىڭ ٷيٸن تٸنتۋ بارىسىندا قارۋ مەن ەسٸرتكٸ تابىلعان» دەلٸنگەن پاۆلودار وبلىستىق قىلمىستىق ٸستەر جٶنٸندەگٸ مامانداندىرىلعان اۋدانارالىق سوتى باسپاسٶز قىزمەتٸنٸڭ حابارلاماسىندا.
سوت وتىرىسىندا تاعىلعان ايىپ بويىنشا ەپيزودتاردا ج-نىڭ كٸنەسٸ دەلەلدەندٸ.
ول ٶمٸر بويىنا باس بوستاندىعىنان ايىرىلدى.
ٷكٸم زاڭدى كٷشٸنە ەنگەن جوق.
