الماتىدا سانيتارلىق تالاپتى ساقتاماعان كٶك بازار باسشىلىعىنا 1 ملن 722 مىڭ تەڭگە ايىپپۇل سالىندى. بۇل تۋرالى ونلاين بريفينگ بارىسىندا قالانىڭ باس سانيتارلىق دەرٸگەرٸ جانداربەك بەكشين ايتتى, دەپ حابارلايدى "ۇلت اقپارات".
«ٶزدەرٸڭٸز بٸلەسٸزدەر, ناۋرىزدا الماتىدا كوروناۆيرۋس كٶبٸنەسە سىرتتان كەلگەن ادامداردان تابىلدى. قازٸر ۆيرۋس تارالۋ كٶرسەتكٸشٸ ارتىپ كەلەدٸ. كٶبٸنەسە ادامداردىڭ ٶزدەرٸ ەمدەۋ مەكەمەلەرٸنە حابارلاسىپ جاتىر. ونىڭ ٸشٸندە «راحات» فابريكاسىن, كٶك بازاردى ايتۋعا بولادى. «راحات» فابريكاسى ٶز ەركٸمەن 2 اپتاعا جابىلدى. كٶك بازاردىڭ جۇمىسى سوت شەشٸمٸمەن 1 ايعا توقتاتىلدى. سەبەبٸ تٶرت ورگاننىڭ ٶكٸلدەرٸنەن قۇرالعان مونيتورينگ جۇمىستارى بارىسىندا بەرٸلگەن ەسكەرتۋلەردٸ ۋاقىتىندا ورىنداماعانى ٷشٸن بازار باسشىلىعىنا 1 ملن 722 مىڭ تەڭگە ايىپپۇل سالىندى», - دەدٸ جانداربەك بەكشين.
الماتىداعى كٶك بازاردا كوروناۆيرۋس 20 ادامنان انىقتالعانى تۋرالى مۇنىڭ الدىندا جازعان ەدٸك.
ودان كەيٸن تاعى بٸر ادامنىڭ تالداۋى وڭ نەتيجە كٶرسەتكەن.
