قىرعىزستان تٶتەنشە جاعدايلار مينيسترلٸگٸ (تجم) باسپاسٶز قىزمەتٸ "قىتايدىڭ بٸشكەكتەگٸ ەلشٸلٸگٸندە بولعان جارىلىستان بٸر ادام قازا تاۋىپ, ٷش ادام جارالانعانىن" حابارلادى.
قازٸر قۇتقارۋشىلار, ٶرت سٶندٸرۋشٸلەر, جەدەل جەردەم دەرٸگەرلەرٸ وقيعا بولعان جەردە جٷر. قىرعىزستان تج مينيسترٸ كۋباتبەك بورونوۆ تا وقيعا ورنىنا بارعان.
قىرعىزستان پرەمەر-مينيسترٸنٸڭ ورىنباسارى جەڭيش رازاكوۆ تا بٸشكەكتەگٸ قىتاي ەلشٸلٸگٸندە جٷر. مەلٸمەتكە قاراعاندا, جانكەشتٸ "ميتسۋبيسي دەليكا" كٶلٸگٸمەن ەلشٸلٸكتٸڭ باتىس جاعىنداعى بروندالعان قاقپاسىن سوعىپ كٸرٸپ, جارىلىس قۇرىلعىسىن ٸسكە قوسقان. جارىلىستان جانكەشتٸنٸڭ كٶلٸگٸ تالقان بولىپ, تەحنيكا قالدىقتارى جان-جاققا شاشىلعان, جەنكەشتٸنٸڭ دەنەسٸ دە بٸرنەشە بٶلٸككە بٶلٸنٸپ كەتكەن.
قىتاي ەلشٸلٸگٸ بٸشكەكتەگٸ "كيرگيزييا-2" اۋدانىنداعى باكاەۆ كٶشەسٸندە ورنالاسقان. ەلشٸلٸكتٸڭ قىرعىزستاندىق كٷزەتشٸسٸ باسىنان جاراقات العان. جانكەشتٸدەن باسقا قۇربان جوق. ازاتتىقتىڭ قىرعىز قىزمەتٸنٸڭ حابارلاۋىنشا, جانكەشتٸنٸڭ ماقساتىنا جەتۋٸنە بروندالعون قاقپا كەدەرگٸ كەلتٸرگەن.
بٸشكەكتٸڭ قالالىق مەديتسينالىق جەدەل جەردەم قىزمەتٸ ٷش ادامنىڭ جاراقات العانىن حابارلادى.
قىتاي ەلشٸلٸگٸ اۋماعىندا بولعان جارىلىستان ماڭايىنداعى ٷيلەردٸڭ تەرەزەلەرٸ سىنعان. بۇل تۋرالى سول اۋدانداعى ٶزٸن زامير دەپ تانىستىرعان كٷزەتشٸ ايتقان. ونىڭ سٶزٸنە قاراعاندا, جارىلىس كەزٸندە شىققان وتتىڭ جالىنى ٶتە بيٸك بولعان.
ەلشٸلٸك اۋماعىندا جارىلىستىڭ قاتتى بولعانىن, تەرەزەلەردٸڭ سىنعانىن سول ماڭداعى تۇرعىندار دا راستادى.
