Qyrǵyzstan tótenshe jaǵdailar ministrligi (TJM) baspasóz qyzmeti "Qytaidyń Bishkektegi elshiliginde bolǵan jarylystan bir adam qaza taýyp, úsh adam jaralanǵanyn" habarlady.
Qazir qutqarýshylar, órt sóndirýshiler, jedel járdem dárigerleri oqiǵa bolǵan jerde júr. Qyrǵyzstan TJ ministri Kýbatbek Boronov ta oqiǵa ornyna barǵan.
Qyrǵyzstan premer-ministriniń orynbasary Jeńish Razakov ta Bishkektegi Qytai elshiliginde júr. Málimetke qaraǵanda, jankeshti "Mitsýbisi Delika" kóligimen elshiliktiń batys jaǵyndaǵy brondalǵan qaqpasyn soǵyp kirip, jarylys qurylǵysyn iske qosqan. Jarylystan jankeshtiniń kóligi talqan bolyp, tehnika qaldyqtary jan-jaqqa shashylǵan, jenkeshtiniń denesi de birneshe bólikke bólinip ketken.
Qytai elshiligi Bishkektegi "Kirgiziia-2" aýdanyndaǵy Bakaev kóshesinde ornalasqan. Elshiliktiń qyrǵyzstandyq kúzetshisi basynan jaraqat alǵan. Jankeshtiden basqa qurban joq. Azattyqtyń Qyrǵyz qyzmetiniń habarlaýynsha, jankeshtiniń maqsatyna jetýine brondalǵon qaqpa kedergi keltirgen.
Bishkektiń qalalyq meditsinalyq jedel járdem qyzmeti úsh adamnyń jaraqat alǵanyn habarlady.
Qytai elshiligi aýmaǵynda bolǵan jarylystan mańaiyndaǵy úilerdiń terezeleri synǵan. Bul týraly sol aýdandaǵy ózin Zamir dep tanystyrǵan kúzetshi aitqan. Onyń sózine qaraǵanda, jarylys kezinde shyqqan ottyń jalyny óte biik bolǵan.
Elshilik aýmaǵynda jarylystyń qatty bolǵanyn, terezelerdiń synǵanyn sol mańdaǵy turǵyndar da rastady.
