01 мау, 2021 сағат 16:48

Теннис: Путинцева Ролан Гаррос турнирінде жеңіліп қалды


Қазақстандық Юлия Путинцева Парижде Ролан Гаррос турнирінің екінші айналымына шыға алмады, деп хабарлайды "Ұлт ақпарат".

Дүниежүзілік рейтингте 43-орында тұрған Ю.Путинцева алғашқы айналымда әлемнің 26-ракеткасы, Тунис өкілі Онс Жабермен кездесті. 

Бірінші партияда О.Жабер 7:5 есебімен басым түсті.

Тунис теннисшісі екінші сетте тіпті бет қаратпады – 5:0. Бұдан кейін қазақстандық спортшы қатарынан екі гейм алғанымен, О.Жабер матчты тағы бір брейкпен түйіндеді – 6:2.

Бәсеке 1 сағат 19 минутқа созылды.

Осылайша Франция ашық чемпионатында Қазақстаннан жекелей сында Елена Рыбакина мен Зарина Дияс қалды.

Қазақстанның бірінші, әлемнің 22-ракеткасы Е.Рыбакина екінші айналымда рейтингте 82-сатыдағы жапониялық Нао Хибиномен шеберлік байқасады. Ал З.Дияс әлемнің 15-ракеткасы, бельгиялық Элиза Мертенспен кортқа шығады.

Еске сала кетейік, бұдан бұрын Зарина Диястың Ролан Гаррос турнирінің екінші айналымына шыққанын, Александр Бубликтің әлемнің екінші ракеткасына есе жібергенін жазған болатынбыз.