Белгілі жазушы Несіпбек Дәутайұлы өмірден өтті, деп хабарлайды "Ұлт ақпарат".
Қаралы хабарды ақын Маралтай Райымбекұлы әлеуметтік желіде естіртті.
"Несіпбек ағам қайтыпты...
Қазағыма көңіл айтам!", - деп жазба қалдырған ақын.
Қаза туралы жазушы Бейбіт Сарыбай да әсерлі жазба жариялады.
Несіпбек Дәутайұлы 1947 жылы 30 ақпанда Жамбыл облысы Қордай ауданы Киров атындағы колхозда (қазіргі Кенен ауылы) өмірге келген. Қазақ мемлекеттік университетінің түлегі.
Еңбек жолын 1972-1980 жылдары аудандық «Қордай» газетінде тілші, бөлім меңгерушісі, жауапты хатшы ретінде бастады.
Кейін Жамбыл облыстық газетінде меншікті тілші болған.
Соңғы жылдары «Жамбыл» әдеби-көпшілік журналының бас редакторы, Қазақстан Жазушылар одағы Жамбыл облыстық филиалының директоры болып жұмыс істеді.
Ғ.Мұстафиннің 100 жылдығына арналған әдеби бәйгенің, Халықаралық «Дарабоз» әдеби бәйгесінің жеңімпазы.
ҚР Тәуелсіздігі және Астананың 10 жылдығына арналған медальдармен марапатталған.
ҚР Ұлттық кітапханасы өткізген «Ең үздік роман» байқауында «Құдірет пен қасірет» романы жүлдеге ие болған.
Халықаралық «Алаш» әдеби сыйлығының лауреаты.
Жазушының артында оқырманға мұра болып «Ақ көгершін», «Алма ағашының бұтағы», «Әнім сен едің» атты повестері, «Құдірет пен Қасірет» романы, «Көгілдір көйлекті келіншек», «Ойынды еті он бөлек», ІІ томдық таңдама шығармалар жинағы, «Аты жоқ әңгіме», «Кісі иесі» сияқты кітаптары қалды.
Көзі тірісінде бір топ шығармасы «Жол» деген атпен түрік тілінде жарық көрді.
Осы орайда, Ұлт порталының ұжымы қазақ жұртына, оның ішінде әдебиетсүйер қауымға қадірлі болған аса көрнекті қаламгердің мезгілсіз дүниеден озуына байланысты оның отбасы мен туған-туыстарына қайғырып көңіл айтады.
Марқұмның жатқан жері жайлы, топырағы торқа болсын. Пейіште нұры шалқып, Жаратқан артындағы ұрпағына ұзақ ғұмыр берсін!
