Syrtqy ister ministri Muhtar Tileýberdi reseilik depýtat Gennadii Ziýganovtyń Qazaqstannyń soltústik aimaqtary týraly málimdemesinen keiin Qazaqstan nege narazylyq bildirmeitinin túsindirdi, - dep habarlaidy Tengrinews.kz.
"Resmi narazylyq bolmaidy. Biz Ziýganov Resei Federatsiiasynyń Kommýnistik partiiasynyń kóshbasshysy ekenine súienemiz. Ol qazirgi úkimetke oppozitsiialyq partiia retinde tanylǵan. Oppozitsiia árqashan qazirgi biliktiń resmi ustanymynan bólek nemese tipti oǵan qaishy keletin sol nemese basqa pikirdi ustanady.
Ziýganovtyń sózin Reseidiń federal arnalarynyń eshqaisysy kórsetken joq. Prezidentimizdiń Máskeýge jumys sapary barysynda Reseidiń Qazaqstanǵa aýmaqtyq talaptary joq ekeni joǵary deńgeide rastaldy", - dedi Tileýberdi Úkimet otyrysynan keiin jýrnalisterdiń saýaldaryna jaýap berip.
Ol Resei Kommýnistik partiiasy KSRO Kommýnistik partiiasynyń iz basýshysy jáne sol ideologiiaǵa negizdelgenin, iaǵni ol dúniejúzilik sotsialistik revoliýtsiiany júzege asyrýdy jáne búkil álemde proletariat diktatýrasyn ornatý maqsatyn kózdeitinin aitty.
"Nazaryńyzdy bul video 2 ai ótken soń paida bolǵanyna aýdarǵym keledi. Bul videonyń Ýkrainadaǵy oqiǵalar kezinde paida bolýy kezdeisoq emes. Qarýly áskeri qaqtyǵys aqparattyq keńistiktegi kúrestiń shielenisýimen qatar júretinin jáne Qazaqstannyń aqparattyq keńistigin qamtitynyn túsiný kerek.
Belgili bireýler men arandatýshylyqtarǵa qarsy áreketti ózderińiz, jýrnalister eskerýi kerek ekenin túsinýińiz kerek. Sizder bul video nege buryn emes, qazir shyqqanyn anyqtaýyńyz kerek. Ony kim jariialady jáne t.b.", - dep qosty ministr.
Eske salsaq, Ziýganov Qazaqstannyń rýsofobiialyq saiasatyn alǵa tartyp, RF biligin QR soltústik óńirleriniń turǵyndaryn qorǵaýǵa shaqyrady. Kommýnisterdiń jetekshisiniń aitýynsha Resei Baiqońyrdan bastap qarý-jaraq ýran óndiretin eń mańyzdy zaýyttardy jáne poligondy qorǵaý úshin bárin jasaýy kerek.
«Ol úshin Qazaqstan basshylyǵymen barlyq qajetti konsýltatsiialardy ótkizip, tildik, mádeni jáne rýhani qaýipsizdikke kepildik beretin túbegeili sharalardy qabyldaý qajet», — dep atap ótti saiasatker.
