«Qazaqmys» Toby óndiristik kásiporyndardy tehnikalyq qaita jaraqtandyrý jumysyn júrgizýde. «Jylandy» jáne «Nurqazǵan» kenishterine jerasty jaǵdaiynda tereń jeldetpe uńǵymalaryn burǵylaýǵa arnalǵan zamanaýi Sandvik DL431 markaly eki burǵylaý qondyrǵysy jetkizildi.
Jańa tehnika burǵylaý jumysynyń ónimdiligin arttyrýǵa, tazartý bloktaryn daiyndaýda joǵary dáldikti qamtamasyz etýge jáne jumyskerlerdiń eńbek jaǵdaiyn jaqsartýǵa múmkindik beredi. Qondyrǵy berik taý jynysy kezdesetin ken oryndaryn igerý kezinde paidalanylady, sebebi mundai jaǵdaida jabdyqtyń senimdiligi men óndiristik úderistiń tiimdiligi sheshýshi ról atqarady.
Sandvik DL431 – óndirý jumysyna arnalǵan tolyq mehanikalandyrylǵan elektrogidravlikalyq burǵylaý qondyrǵysy. Ol diametri 64 mm-den 115 mm-ge deiingi uńǵymalardy 54 metrge deiingi tereńdikte burǵylaýǵa múmkindik beredi. Qondyrǵy zamanaýi avtomattandyrý júiesimen, joǵary dáldiktegi pozitsiialaý júiesimen jáne operatorǵa arnalǵan ergonomikalyq jumys ornymen jabdyqtalǵan.
Jańa burǵylaý qondyrǵylaryn jetkizý «Qazaqmys» Tobynyń taý-ken tehnikasyn jańǵyrtýǵa baǵyttalǵan aýqymdy baǵdarlamasynyń bir bóligi bolyp tabylady. 2026 jyly kompaniia 22 zamanaýi burǵylaý qondyrǵysyn satyp alýǵa 9,9 mlrd teńge bóldi. Jańa tehnika óndiristik alańdarǵa kezeń-kezeńimen jetkizilip jatyr.
Tehnika parkin jańartý kompaniiaǵa ken óndirý tiimdiligin arttyrýǵa, zamanaýi tehnologiialardy engizýge jáne kásiporyndarda qaýipsiz eńbek jaǵdaiyn qamtamasyz etýge múmkindik beredi.
