Almatyda taýda serýendep júrgen 11 jastaǵy qyzdy belgisiz jándik nemese janýar shaǵyp, jansaqtaý bólimine tústi. Dárigerler balany jylan shaqqan bolýy múmkin dep boljap otyr, dep habarlaidy ult.kz.
Qalalyq Qoǵamdyq densaýlyq saqtaý basqarmasy habarlaýynsha, oqiǵa 19 qyrkúiekte bolǵan. Qyz taýda serýendep júrgen kezde birdeńe shaǵyp alǵan. Ata-anasy onyń naqty neden zardap shekkenin anyqtai almaǵan.
Bala Almaty qalalyq balalar shuǵyl meditsinalyq kómek kórsetý ortalyǵyna jetkizilgen. Dárigerler onyń kóz mańynan isiný, álsizdik pen uiqyshyldyqty, sondai-aq sol aiaǵyndaǵy shaqqan jerdiń isingenin anyqtaǵan. Osydan keiin qyz jansaqtaý jáne qarqyndy terapiia bólimine jatqyzylǵan.
Mamandar balany naqty sur jylan shaqqanyn rastamaǵanymen, mundai boljamdy joqqa shyǵarmaidy. Basqarma málimetinshe, bul Almatyda jylan shaǵý boiynsha tirkelgen alǵashqy jaǵdai bolýy múmkin.
Ýly jylan shaǵý qaýpin eskere otyryp, qyzǵa jylanǵa qarsy sarysýdyń bir dozasy engizilgen. Vedomstvo sarysý Ózbekstannan arnaiy aldyrylmaǵanyn atap ótti. Qajetti preparat bala aýrýhanaǵa túsken kezde statsionarda bolǵan jáne qazir de bar.
Sarysý engizilgennen keiin balanyń jaǵdaiynda oń dinamika baiqalǵan. Qazir onyń jaǵdaiy turaqty, dárigerlerdiń baqylaýynda jáne qajetti em alyp jatyr.
Mamandar sarysýdyń qosymsha dozasy balanyń klinikalyq jaǵdaiyna jáne em dinamikasyna qarai ǵana engiziletinin túsindirdi.
Qoǵamdyq densaýlyq saqtaý basqarmasynyń málimetinshe, jylanǵa qarsy qajetti sarysý Almatydaǵy meditsinalyq uiymdarda, sonyń ishinde travmatologiialyq pýnktterde de bar.
