Atmosfera aýasynyń lastanýy búgingi kúnniń ózekti máseleleriniń biri. Bul týraly QR Ekologiia, geologiia jáne tabiǵi resýrstar ministrligi Ekologiialyq retteý jáne baqylaý komitetiniń tóraǵasy Zulfýhar Joldasov aitty, dep habarlaidy QazAqparat.
«Búgingi tańda kópshilikti atmosfera aýasy men stihiialyq qoqystar máselesi alańdatady. Osy problemalardy sheshý úshin ministrlik birqatar júieli is-shara qabyldaýda. Birinshiden, eldegi ekologiialyq jaǵdaidy jaqsartý úshin óńirlerdegi ekologiialyq problemalardy keshendi sheshý jónindegi Jol kartalary iske asyryldy. Ekinshiden, atmosferalyq aýanyń sapasyn qamtamasyz etý boiynsha «Jasyl Qazaqstan» ulttyq jobasynyń is-sharalary júzege asyrylýda. Úshinshiden, ónerkásiptik kásiporyndardyń qyzmetin ekologiialyq retteý jáne baqylaý júrgizilýde. Anyqtamalyqtar ázirlenýde jáne óndiristik obektilerde eń ozyq qoljetimdi tehnologiialar engizilýde. Parniktik gazdar shyǵaryndylaryn azaitý jónindegi jol kartasy ázirlendi. Tarihi lastanýlardy joiý júrgizilýde. Ekologiialyq shielenis oshaqtarynyń kartasy ázirlendi. Ekologiialyq zańnamany jetildirý júzege asyrylady», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, atmosfera aýasynyń lastanýy búgingi kúnniń ózekti máseleleriniń biri bolyp otyr.
«Temirtaý, Nur-Sultan, Almaty, Aktóbe, Atyraý, Óskemen, Qaraǵandy, Balqash, Jezqazǵan, Shymkent qalalarynda atmosfera aýasynyń joǵary lastanýy oryn alǵan. Onyń birneshe sebebin aitýǵa bolady: Almaty jáne Nur-Sultanda – jylý kózderi, avtokólik jáne jeke sektor. Óskemen jáne Temirtaý qalalarynda - ónerkásip. Aqtobe jáne Atyraý qalalarynda – eskirgen káriz tazartý qurylǵylary. Ekologiialyq problemalardy onyń ishinde atmosfera aýasynyń sapasyn jaqsartý maqsatynda ministrlik aýmaqtyq ákimdiktermen birigip ekologiialyq problemalardy keshendi sheshý boiynsha jol kartalaryn bekitti. 2021 jyly barlyǵy 36 is-shara iske asyryldy», - dedi Joldasov.
