AQSh-ta JetBlue áýe kompaniiasynyń Las-Vegastan Niý-Iorkke baǵyt alǵan Airbus A321jolaýshylar ushaǵy qonýǵa jaqyndaǵan sátte dronmen soqtyǵysty, dep habarlaidy ult.kz.
Oqiǵa jerden shamamen 900 metr (3000 fýt) biiktikte, jergilikti ýaqytpen tańǵy 07:15 shamasynda bolǵan. Ushqysh áýe qozǵalysyn basqarý qyzmetine dron ushaqtyń kabinasynyń dál ústińgi bóligine tigenin habarlaǵan.
Soǵan qaramastan ekipaj tótenshe kómek suramaǵan. Ushaq Niý-Iorktegi Djon Kennedi halyqaralyq áýejaiyna (JFK) sátti qonyp, barlyq jolaýshy qalypty túrde túsirildi. Keiin áýe kemesi tehnikalyq tekserýden ótkizilgenimen, mamandar ushaqtan eshqandai zaqym nemese soqtyǵys izderin anyqtamaǵan.
Oqiǵanyń mán-jaiyn AQSh Federaldyq aviatsiia basqarmasy (FAA) tergep jatyr. Vedomstvonyń málimetinshe, eldegi áýejailardyń mańynda ai saiyn drondardyń zańsyz ushqany týraly júzden astam habarlama túsedi. Mundai áreket ushaqtardyń qaýipsizdigine aitarlyqtai qaýip tóndiredi jáne zań buzýshylarǵa iri kólemde aiyppul salynýy nemese qylmystyq jaýapkershilikke tartylýy múmkin.
