Premer-ministr Oljas Bektenov jolaýshylar tasymalynyń qaýipsizdigin qamtamasyz etý úshin taksi qyzmetin retteýge qatysty birqatar tapsyrma berdi, dep habarlaidy ult.kz.
Úkimet otyrysynda jol qaýipsizdigi máselesi qaralyp, taksi agregatorlarynyń qyzmetin baqylaýdy kúsheitý, júrgizýshilerdi irikteý talaptaryn qatańdatý jáne jolaýshylar tasymalyn retke keltirý máseleleri talqylandy.
Oljas Bektenovtiń aitýynsha, taksi qyzmetine júrgizýshilerdi qabyldaý kezinde olardyń tájiribesi men joldaǵy tártibine erekshe nazar aýdarý qajet.
«Júrgizýshi kýáliginen aiyrylǵan nemese jol erejelerin jii buzǵan adamdar taksi salasynda jumysqa qabyldanbaýy tiis», – dedi Premer-ministr.
Sondai-aq taksi kólikteriniń tehnikalyq jaǵdaiyn baqylaý jáne júrgizýshilerdiń belgilengen jumys ýaqytynan artyq jumys isteýine jol bermeý qajettigi aityldy.
Osyǵan bailanysty Úkimet basshysy birqatar tapsyrma berdi.
Kólik ministrligine «Atameken» ulttyq kásipkerler palatasymen birlesip, jekemenshik taksi qyzmetin retteýge qatysty qosymsha sharalar qabyldaý tapsyryldy. Bul rette kórsetiletin qyzmetterdiń sapasyna qoiylatyn talaptar normativtik qujattarda naqty belgilenýi kerek.
Ishki ister ministrligine zańsyz jolaýshylar tasymaldaýshylaryn anyqtaý boiynsha jumysty turaqty júrgizý tapsyryldy. Sonymen qatar ár óńirdegi jol-kólik oqiǵalaryna turaqty taldaý júrgizilip, apat kóp bolatyn ýchaskelerde baqylaýdy kúsheitý qajet.
Tótenshe jaǵdailar ministrligine Densaýlyq saqtaý ministrligimen jáne ákimdiktermen birlesip, joldardaǵy apat jaǵdailaryn eskere otyryp, keibir meditsinalyq-qutqarý beketteriniń ornalasýyn qaita qaraý tapsyryldy.
Al Oqý-aǵartý, Mádeniet jáne aqparat, Týrizm jáne sport ministrlikteri men ákimdikterge oqýshylardy bilim berý, mádeni jáne sporttyq is-sharalarǵa tasymaldaý kezinde politsiia qyzmetkerleriniń alyp júrýin qamtamasyz etý mindeti qoiyldy.
Sonymen qatar jol qozǵalysy jáne qaýipsizdik erejelerin saqtaý boiynsha aqparattyq-túsindirý jumystaryn kúsheitý tapsyryldy.
Tapsyrmalardyń oryndalýyn úilestirý jáne baqylaý Premer-ministrdiń birinshi orynbasary Nurlybek Nálibaevqa júkteldi.
