Ziialy qaýymdy rýhani máselelerdi sheshýge jumyldyrý kerek. QR Tuńǵysh Prezidenti Nursultan Nazarbaev osylai dedi, dep habarlaidy QazAqparat.
«Halyqpen naqty jumys júrgizý qaǵidatyn jolǵa qoiý kerek. Sailaýshylardyń múddesine sai keletin baǵdarlamalardy qolǵa alý qajet. Bul – álemdik tájiribe. Al bizde qalai? Qazirgi tańda partiia 24 jobamen, 200-ge jýyq túrli esep berýmen ainalysyp keledi. Onyń barlyǵy – Úkimettiń jumysy, partiianiki emes. Qarjyny, materialdyq resýrstardy sol úshin rásýa etedi. Sondyqtan, partiianyń barlyq jobalaryn qaita qaraý kerek. Olar naqty áleýmettik toptarǵa arnalýy tiis. Memlekettik organdardyń jumysyn qaitalamaý kerek. Partiianyń jumysy basqa», - dedi Elbasy «Nur Otan» partiiasy Saiasi keńesiniń keńeitilgen otyrysynda.
Nursultan Nazarbaev óz sózinde partiianyń ózinde sátti jobalary baryn, olardyń qatarynda «Ardagerlerdi ardaqtaiyq» sekildi jaqsy jobalar baryn tilge tiek etti.
«Kópbalaly analar úshin «Baqytty otbasy» degen ortalyqtar ashylýda. Kóbeitip, solardyń jumysyn júrgizý kerek. Osyndai tájiribelerdi jappai engizgen jón. Máselen, «Miras» qoǵamdyq keńesiniń áleýetin paidalanyp, ziialy qaýymdy rýhani máselelerdi sheshýge jumyldyrý kerek. Ziialy qaýym degenimiz otyryp alyp, men jazýshymyn nemese kompozitormyn dep, tek synaýmenen ǵana bolý kerek pe? Ziialy qaýym – halyqtyń aldynda júretin, jol kórsetetin bastaýshysy bolýy kerek», - dedi ol.
Óz sózinde Nursultan Nazarbaev «Rýhani jańǵyrý», «Uly dalanyń jeti qyry» maqalalaryn eske aldy.
«Sondyqtan, ziialy qaýymmen birge jumys júrgizý kerek», - dedi ol.
