Ziialy qaýym ókilderi bolashaq ómir týraly máseleni qazirden oi tarazysyna sala berýge tiis. Bul týraly Memleket basshysy Qasym-Jomart Toqaev Respýblikalyq «Ana tili» basylymyna bergen suhbatynda aitty, dep habarlaidy "Ult aqparat".
«Shyn máninde, ozyq oily ziialy qaýymnyń pikiri áleýmettik shielenis kezinde mańyzdy ról atqarady. Adamdar aqyl-parasaty arqyly ishki túisigine qulaq asyp, ózine qajetti qorytyndy jasap, ótken isten sabaq alady. Ásirese bul ejelden kele jatqan dástúri bar bizdiń qoǵam úshin óte ózekti. Pandemiia kezinde memlekettik saiasatty júzege asyrýǵa qosqan eleýli úlesi úshin barsha ziialy qaýym ókilderine, onyń ishinde akademik Tóregeldi Sharmanovqa shynaiy rizashylyǵymdy bildiremin. Sondai-aq bizdiń belgili aqyn-jazýshylarymyz sońǵy kezdegi oqiǵalarǵa belsendirek aralasyp, jastarǵa ómirlik tájiribesin úiretip, temirqazyq sekildi jol kórsete alady dep oilaimyn», - dedi QR Prezidenti.
Memleket basshysy qazir búkil dúniejúzi pandemiia saldarymen kúresip jatqanyn, álemdik ekonomika kóz aldymyzda quldyrap, jurttyń ómir súrý salty ózgergenin jáne osy úrdister kún tártibindegi ózekti máselelerge ainalǵanyn basa aitty.
«Mine, osyndai kezde jas urpaqqa bedeldi aqyl-oi ieleriniń parasatty pikiri aýadai qajet. Bárimizdi, ásirese jastardy «Ary qarai qalai ómir súremiz?» degen saýal mazalaidy. Osyndai sátte bizdiń kózqarasymyz, bolmysymyz, osy biz ómir súrip jatqan jańa zamannyń talabyna sai bolýy kerek. Iaǵni tarihi turǵydan jańartylǵan qundylyqtarǵa bet burýǵa tiispiz. Bizge qazirgi zamannyń syn-qaterlerine tótep beretin aqyl-oi tujyrymy qajet. Joǵary zamanaýi tehnologiia, robottar, jasandy intellekt dáýirinde aqyl-keńes túsinigi erekshe mańyzdy bolmaq. Jańa zamanda ar, namys, uiat siiaqty adami qasietterge qajettilik bola ma? Meniń oiymsha, bul – ziialy qaýym ókilderi talqylaityn aýqymdy filosofiialyq másele. Úlgi-ónege, ulttyq qundylyqtar bolmasa, mashinalar men robottar áleminde jutylyp ketetinimiz sózsiz. Bizdiń uly aqyn-jazýshylarymyzdyń shyǵarmalary da mańyzyn joǵaltady. Árine, mundai jaǵdaidyń múlde bolmaǵany jaqsy. Sondyqtan ziialy qaýym ókilderi bolashaq ómir týraly máseleni qazirden oi tarazysyna sala berýge tiis», - dedi Qasym-Jomart Toqaev.
