Sh.Ýálihanov atyndaǵy Tarih jáne etnologiia institýtynyń direktory, tarih ǵylymdarynyń doktory, professor Ziiabek Qabyldinov Memleket basshysy Qasym-Jomart Toqaevtyń «Egemen Qazaqstan» gazetinde jariialanǵan «Abai jáne HHI ǵasyrdaǵy Qazaqstan» atty maqalasyna qatysty pikir bildirdi, dep habarlaidy QazAqparat.
«Budan buryn bizdiń elimizde «Rýhani jańǵyrý» maqalasy jariialanǵanyn bilesizder. Endeshe, eldi jańǵyrtý, tarih taǵylymyn keleshekke shyraq etip ustaý sipatyndaǵy igi isti biz Abaidan bastaýymyz kerek. Abai degen dástúrli qazaq qoǵamy ǵana emes, ol – kemel keleshek. Abaidyń muralary qazaq halqynyń nemese musylman áleminiń ǵana emes, búkil adamzattyń qundylyǵy ekenin atap ótken Memelket basshysy Qasym-Jomart Kemeluly Toqaevtyń sózimen tolyq kelisemin. Sol sebepti Prezident búkil álem boiynsha Abai ortalyǵyn ashýdy tekke usynyp otyrǵan joq. Ol ortalyqtar adamdardy Abai shyǵarmasymen tanystyryp qana qoimai, búkil qazaq halqyn álemge tanytady», - deidi Ziiabek Qabyldinov.
Professordyń pikirine qulaq assaq, Memleket basshysynyń elordada jáne oishyldyń týǵan jerinde eki iri konferentsiia ótkizý týraly bastamasynyń mańyzy zor.
«Ol jiyndarǵa eldegi búkil abaitanýshylar men ǵalymdar jinalyp, Abai shyǵarmalary búkil álemge keńirek nasihattala túsedi. Abai shyǵarmalaryn álemniń birneshe tiline aýdarý bastamasyna erekshe úmit kútemin», - deidi ol.
Ziiabek Qabyldinov sonymen qatar, abaitaný ǵylymyn órkendetý, oishyldyń taǵylymyn urpaq sanasyna sińirý boiynsha da pikirin bildirdi.
«Osydan birneshe jyl buryn joǵary synyptarǵa arnap «Bizdiń Prezident» atty kitap jaryqqa shyqqan bolatyn. Kitap qarapaiym ári túsinikti tilmen jazylǵan. Elbasynyń ómiri men eńbegi týraly baian etedi. Meniń oiymsha, osy ádispen «Meniń Abaiym» atty ártúrli tilde kitap jazý kerek. Abai Qunanbaiulynyń kim ekenin árbir oqýshy bilýi tiis. Bul kitaptar júz myńdaǵan danamen oqyrmanǵa, eń aldymen joǵary synyptaǵy oqýshylarǵa tarasa igi bolar edi», - deidi tarihshy.
Ziiabek Qabyldinovtyń aitýyna qaraǵanda, uly aqynyn ulyqtai bilgen eldiń rýhaniiaty da myǵym bolmaq.
«Árbir kitaphanada Abaidyń shyǵarmalary jariialanǵan kitaptar men Muhtar Áýezovtyń «Abai joly» kitaby turýy kerek degen Prezidenttiń pikirin kóńilimnen shyqty. Sebebi, Abaidyń shyǵarmasynda qazaqtyń búkil ómiri, minez-qulqy men kózqarasy kórinedi. Sol sebepti, qazaq halqy Abaidy budan da tereń tanyp, keleshegine senimi nyǵaia túser degen oidamyn», - dedi ol.
Eske sala ketsek, «Egemen Qazaqstan» gazetiniń búgingi sanynda QR Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasy jariialanǵan bolatyn.
