Qaraǵandy oblysynda bir qabirge qatysty daý eki otbasyny sotqa deiin jetkizdi. Máiitti eksgýmatsiialaý nátijesinde kópten beri jalǵasqan daýǵa núkte qoiyldy, dep habarlaidy ult.kz.
31-arnanyń “Informbiýro” jańalyqtar baǵdarlamasynyń habarlaýysha, oqiǵa Buqar jyraý aýdanyndaǵy Qurylys aýylynda bolǵan. Jergilikti turǵyn Aigúl Jamilenova anasyn 2024 jyldyń qarashasynda musylman ziratyna jerlegen. Onyń aitýynsha, qabir ornyn zirat kúzetshisi men jerleý qyzmetin kórsetken kásipker belgilep bergen.
Alaida arada birneshe ai ótken soń áiel kúieýimen birge anasynyń basyna mazar turǵyzýǵa kelgende, qabir basynda bóten adamnyń aty-jóni jazylǵan qulpytas pen qorshaýdy kórgen. Osydan keiin ol anasynyń qabiriniń ústine basqa adam jerlengen dep eseptep, sotqa júgingen.
Daýdy qaraǵan sottyń apelliatsiialyq alqasy máiitti eksgýmatsiialaý týraly sheshim shyǵardy. Saraptama nátijesi talapkerdiń kúdigin rastamady. Qabirde dál qulpytasqa aty jazylǵan adamnyń jerlengeni anyqtaldy.
Marqumnyń týystary eksgýmatsiia kezinde deneni tanyǵandaryn aitty.
— Máiitti shyǵarǵanda onyń bizdiń týysymyz ekenin birden bildik. Betin ashqanda tátemdi tanydym, — dedi marqumnyń jieni Nurhan Mailybaev.
Sot saraptamasynyń qorytyndysyna sáikes, qabirde bóten adamnyń máiiti bolmaǵandyqtan, sot tiisti sheshim shyǵardy.
Endi talapker anasynyń naqty qai jerge jerlengenin anyqtaýy tiis. Sonymen qatar sot sheshimine sáikes eksgýmatsiia men sot shyǵyndaryn óteý mindeti de júktelýi múmkin.
Aigúl Jamilenova óz kezeginde moraldyq shyǵyndy óndirý máselesin qarastyryp jatqanyn aitty.
Osylaisha, birneshe aiǵa sozylǵan qabir daýy eksgýmatsiia nátijesinen keiin jańa baǵyt aldy. Endi negizgi másele – marqum áieldiń naqty jerlengen ornyn anyqtaý bolyp otyr.
