Kýáger EXPO-2017 aýmaǵynda bolǵan tótenshe jaǵdaidyń mán-jaiyn aityp berdi, - dep habarlaidy kaz.tengrinews.kz tilshisi.
Kórme keshenindegi pavilondarda jumys istep júrgen lift kompaniiasynyń qyzmetkeri Nikolai Kostenko tótenshe jaǵdai bolmai turyp 2 minýt buryn ketip, aman qalǵan. Jýrnalisterge bergen suhbatynda ol bolǵan oqiǵanyń mán-jaiyn aityp berdi.
"Tótenshe jaǵdai S 1-3 pen S1-4 pavilondarynyń arasynda bolǵan. Olardyń arasynda shynydan salynǵan kópir ornalasqan edi. Endi sol kópir búgin opyryldy. Myna jaǵdai bolmas buryn ketip qalǵanym jaqsy bolypty. Men pavilonǵa kirgen soń ǵana jer silkinisi bolǵandai dybystardy estidim", - dedi er adam.
Onyń aitýynsha, bul oqiǵa túski úzilis kezinde bolǵan. Sol ýaqytta onda jumysshylar da bolmapty.
Sondai-aq, er adam qazirgi ýaqytta onda tótenshe jaǵdaidyń mán-jaiy anyqtalyp jatqanyn aitty. Onyń oiynsha, bul jaǵdai myna sebepterge bailanysty bolyp otyr: "Shynydan salynǵan kópir jaýǵan qardy kótere almady. Qazir endi bul máselemen ainalysady. (...) Eger de munyń barlyǵyn qaita qalpyna keltiretin bolsa, bul qiynǵa soǵady. Onsyz da bul shyny kópirdi bir jyl boiy salǵan bolatyn", - dedi Nikolai Kostenko.
Lift kompaniiasynyń qyzmetkeriniń aitýynsha, opyrylǵan qurylys bólikteriniń astynda pavilondardyń birine ornatylýy tiis eskalatorlar qalyp qaldy.
"Biz pavilondarǵa lift ornatyp jatqan bolatynbyz. Jumysshylarymyz áreń degende ol jaqtan qashyp shyǵa alady. Biz eki eskalatordy ornatýymyz kerek bolatyn. Olardy syrtqa shyǵaryp, túski asqa ketken edik. Osylaisha eskalatorlar opyrylǵan qurylystyń astynda qalyp qoidy", - dedi kýáger.
Eske salaiyq, osyǵan deiin Astanadaǵy EXPO-2017 aýmaǵynda qurylys bóliginiń opyrylǵany habarlanǵan bolatyn. Bul búgin, 16 qarashada birneshe saǵat buryn bolyp otyrǵan jaǵdai Al keiinirek onda bolǵan tótenshe jaǵdaidan bir jumysshynyń aýrýhanaǵa túskeni aityldy.
