Jynystyq saýat taqyrybyn neǵurlym erterek qozǵasaq - nekesiz júkti bolyp qalýdyń, jynystyq jolmen qaýipti aýrý juqtyrýdyń aldyn alamyz. Bul týraly elordada ótken dóńgelek ústelde Y-PEER eriktiler jelisiniń jattyqtyrýshysy Kamila Tuiaqbaeva aitty, dep habarlaidy QazAqparat tilshisi.
«Qazaqstan Respýblikasynyń zańnamasy boiynsha 14 jastan bastap qylmystyq jaýapkershilikke tartylady. 16 jastan bastap jumys isteýge jáne neke qidyrýǵa bolady. Al nege osy jastan bastap ata-ananyń ruqsatynsyz dárigerge qaralý múmkindigi joq?», - deidi Y-PEER eriktiler jelisiniń jattyqtyrýshysy Kamila Tuiaqbaeva.
Onyń aitýynsha, jynystyq saýatqa qatysty pándi mektep baǵdarlamasyna engizý adamnyń jaýapkershilikti sezine bilýine yqpal etedi.
«Bul pánde tek jynystyq qatynas týraly ǵana aitylmaidy. Onyń ne ekeni, saqtanbaǵan jaǵdaida júktilik bolatyndyǵy, oǵan qyz bala da, ul bala da jaýapty ekeni, óz deneńdi qurmetteý, kim kóringendi jolatpaý týraly aitylady. Nege qyz balaǵa «Sen bir adamǵa ǵana turmysqa shyǵyp, bir adammen ǵana jynystyq qatynasta bolý kereksiń« dep úiretip, ul balaǵa ne úshin úiretpeimiz? Jasandy túsik jasatqan qyz balanyń uiatsyz ekenin aitamyz, al osy jerde soǵan sebep bolǵan er bala nege jaýapkershilikke tartylmaidy?
15-16 jastan bastap qyz bala men ul bala bir-birine ózgeshe qarap, gormondar oinai bastaidy. Osyndai tabiǵat zańdylyǵyn toqtatý ońai emes. Bul taqyrypta neǵurlym erterek qozǵasaq, nekesiz júkti bolyp qalýdyń, jynystyq jolmen qaýipti aýrý juqtyrýdyń aldyn alamyz», - deidi ol.
