QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda aldaǵy kúzgi-qysqy kezeńge daiyndyq barysy qaraldy. Júrgizilip jatqan jumystar týraly indýstriia jáne infraqurylymdyq damý ministri B. Atamqulov baiandady, dep habarlaidy "Ult aqparat" primeminister.kz saityna silteme jasap.
Ministrdiń aitýynsha, jalpy alǵanda, 2019-2020 jylǵy jylytý maýsymy turaqty rejimde ótti. Atalǵan kezeńde 24 tehnologiialyq buzýshylyq boldy. Bul 2018-2019 jylǵy tiisti kezeńimen salystyrǵanda 33 jaǵdaiǵa az. Barlyq tehnologiialyq buzýshylyqtar normativtik merzimde joiyldy.
«2019 jyly kómir óndirýshi kompaniialar 111,1 mln tonna kómir óndirdi. Energetikaǵa 57,2 mln tonna, kommýnaldyq turmystyq kásiporyndarǵa jáne halyqqa 10,6 mln tonna kómir jóneltildi», — dedi B. Atamqulov.
Ministrlik jergilikti atqarýshy organdarmen birlesip, 2019-2020 jylǵa Kommýnaldyq turmystyq qajettilikter men halyqtyń kómir ónimine degen tutyný josparyn jasady.
«Apta saiyn monitoring júrgizilip otyrdy. Kómir tapshylyǵy bolǵan joq. Ákimdikterdiń kómirdi erte satyp alýynyń arqasynda suranys kúrt artqan kezde de dúrbeleń bolǵan joq», — dedi vedomstvo basshysy.
Ótken jylytý maýsymynda óńirlerde jeke jáne zańdy tulǵalardyń kommýnaldyq qyzmetter aldyndaǵy debitorlyq bereshegi 13 mlrd teńgeni qurady. Bul ótken jyldyń tiisti kezeńimen salystyrǵanda 780 mln teńgege kóp. Ákimdikter boryshkerlermen debitorlyq bereshekti óteý jáne azaitý boiynsha júieli sharalar júrgizip jatyr.
2020-2021 jylǵy jylytý maýsymyna daiyndyq maqsatynda Ministrlik ákimdikterge barlyq turǵyn úi-kommýnaldyq sharýashylyq, áleýmettik sala obektilerin jáne turǵyn úilerdi jylytý maýsymyna daiyndaý úshin jumys josparyn jiberdi.
«Jergilikti atqarýshy organdarmen birlesip, óńirler boiynsha ai saiynǵy qajettilikti kórsete otyryp, kommýnaldyq-turmystyq maqsatqa jáne halyqqa arnalǵan kómirdiń qajettilik jospary jasaldy. Jalpy, jylytý maýsymyna daiyndyq qyzý júrip jatyr. Kómir tapshylyǵy bolmaýy tiis», — dedi B. Atamqulov.
Qyrkúiek-qarasha ailarynda dúrligýdi boldyrmaý úshin ákimdiktermen birlesip halyqqa arnalǵan kómirdi erterek satyp alý jumystary júrgizilýde.
Ministrdiń aitýynsha, biyl oqý jyly bastalǵanǵa deiin 10 myńdai bilim berý obektisin daiyndaý josparlanǵan. Densaýlyq saqtaý obektileri men turǵyn úilerdiń daiyndyǵyna basa nazar aýdarylady. 6 myńdai densaýlyq saqtaý obektisi men 47 myń turǵyn úidi daiyndaý josparlanǵan.
«Halyqty jylýmen jágen sýmen úzdiksiz qamtamasyz etý úshin 10 myńnan astam avtonomdyq qazandyqty, 5 myń shaqyrym jylýmen jabdyqtaý jelisin jáne 13 myń sýmen jabdyqtaý jelisin daiyndaý kerek», — dedi ministr.
Sondai-aq avtonomdyq qazandyqtardy kómir jáne mazýtpen qamtamasyz etý kerek. «Qazaqstan temir joly» AQ kómir razrezinen óńirlerdiń temir jol tuiyqtaryna deiin vagondardy ýaqytynda jetkizip, kómir tasymalyn júzege asyrady. Kómir daiyndaý boiynsha monitoring Ministrliktiń turaqty baqylaýynda.
